Kalaallit Nunaat Issittumi tamarmiusumi iligiiaani qitiusumik inissisimasoq

USA-mit Issittumut aallartitaq nutaaq Michael Sfraga Folketingimi Kalaallit Nunaat pillugu ataatsimiititaliami marlunngornermi decembarip quligani ataatsimeeqataavoq. Kingornagut Sermitsiamit oqaloqatigineqalaarnissaminut sassarpoq:

 – Neriussimagaluarpunga angalanermi uani Kalaallit Nunaannut Savalimmiunullu tikeraarsinnaassallunga, ajoraluartumilli tamanna pisinnaanngilaq, Michael Sfraga ukiortaap nalaani Kalaallit Nunaaliarnissaminik naatsorsuuteqartoq oqarpoq.

 Issittoq suleqatigiiffiusoq

Issittup Kalaallit Nunaatalu akornanni maannakkut ilungersunartutut inissisimanerat pillugu ambassadøri Issittumi Amerikamiut sillimaniarnermut, piujuartitsilluni aningaasaqarnikkut ineriartornermut Issittumilu naalagaaffiit akornanni attaveqatigiinnerup nukittorsarnissaat pillugit soqutigisaannik ataqatigiissaarisussaq oqarpoq, pitsaasumik suleqatigiinneq pingaarluinnartuusoq.

– Isumaqarpunga maannakkorpiaq Issittumi ilungersunarnerit ilagigaat nunarsuup immikkoortuata isumannaatsuunissaa, patajaalluni naalagaaffiillu Issittumiittut ilaasortaasut akornanni suleqatigiinnissaq. Imaanngilaq isumaqartoqartoq Issittumi siunnersuisoqatigiit atorsinnaanngitsut. Atorsinnaapput suleqatigiippugullu. Ilami naalagaaffiit ilaasortaasut arfineq marluk akornanni suleqatigiinnerulersimaneq takusinnaavara kiisalu naalagaaffiit Issittumiinngitsut naapertuunnerusumik peqataalernissartik soqutigalugu. Siullermik suleqatigiinneq pisariaqartipparput. Aappaattut nunarsuup sinnerata takusimavaa Issittoq pingaartuusoq, avatangiisit, sillimaniarneq allalluunniit eqqarsaatigalugit.

– Kalaallit Nunaat nunarsuarmi naalakkersuinikkut pingaarutilimmik inissisimavoq nunap immikkuullarissumik inissisimaneratigut. Kalaallit Nunaat USA-mut pingaaruteqartuartuusimavoq kiisalu Amerikap avannarliup Issittortaanut, Issittumilu nunat iligiiaarneranni qitiulluinnartumik inissisimalluni, Michael Sfraga Alaskameersoq oqarpoq.

 Ajugaaneq annertooq

Siullermeertumik USA Issittumi ambassadørimik toqqaavoq, tamannalu Folketingimi Kalaallit Nunaat pillugu ataatsimiititaliami siulittaasoq Aaja Chemnitz naapertorlugu takussutissaavoq Issittoq nunarsuarmi naalakkersuinikkut annertuumik alaatsinaanneqartoq:

– Ajugaaneruvoq annertooq maanna USA-mi Issittumi ambassadøreqalernera præsidentimit toqqarneqartumit partiillu akimorlugit aamma Issittoq pillugu oqaaseqarsinnaasumik. Canadamit aamma nalunaarutigineqarpoq Issittumi ambassadørimik toqqaalersaarlutik, taamaalilluta Issittumit aallartitatut sulinerput pitsaanerulersillugu, suleqateqalertussaagatta nunagisaminni naalakkersuisut sinnerlugit oqaaseqarsinnaasunik. Aamma USA-p Issittumi ambassadørianit ilinniarsinnaavugut, taanna ilaatigut allattoqarfeqarmat, Aaja Chemnitz oqarpoq, matumani Issittumi ambassadørimik Kalaallit Nunaata toqqaasussaanera eqqarsaatigalugu:

Københavnimi Canadamiut aallartitaqarfiata uppernarsarpaa Canada Issittumi ambassadørimik toqqaaniartoq, tamannalu aamma Issittumi nunanut allanut politikkianni saqqummersinneqaqqammersumi allassimavoq, Issittumi ambassadørinngortussat ”Canada’s North’-imi allaffeqassasoq allassimalluni.