Kalaallit Nunaat kigutit nakorsaannik 16-inik amigaateqarpoq
Nunatsinni illoqarfiit tallimat kigutit nakorsaannik soqanngillat, illoqarfillu allat peqaraluarlutik suli amigaateqarput. Nunani avannarlerni kigutit nakorsassaaleqineq peqqutaalluni nunatsinni atorfinitsitsiniarnerit ajornakusoorput.
Katinka Hustad / Polfoto
Kalaallit Nunaat kigutit nakorsaannik amigaateqarpoq.
Paragraf 37 naapertorlugu Aqqalu C. Jerimiassenip Agathe Fontaimut apeqqutaani paasinarsivoq maannakkorpiaq nunatsinni kigutit nakorsaattut ilinniarsimasut 16-it amigaatigineqartut.
Maniitsoq, Upernavik, Tasiilaq, Nanortalik Qaanaarlu kigutit nakorsaannik amigaateqarput.
Maniitsoq, Tasiilaq, Nanortalik, Upernavik Aasiannilu sulisussarsiorput. Ilulissani, Sisimiuni Nuummilu kigutit nakorsaannik atorfeqartoqaraluartoq suli amigaateqarput.
Naalakkersuisoq eqqissisaasoq
Naak kigutit nakorsaannik amigaateqartoqaraluartoq Agathe Fontain eqqissisaavoq, kigutileriffimmi sulisut pikkorissuummata. Piaartumik suliarisariallit illoqarfinni allani kigutit nakorsaat attaveqarfigalugit siunnersorneqartarput, naliliinernik ingerlariaqqinnernillu kinguneqarsinnaasunik.
- Kigutileriffinni sulisut, ikiortit kigutigissaasullu pikkorissuupput. Taakku sulisut kigutit nakorsaat illoqarfimmi allamiittut siunnersuisorisarpaat, Peqqissutsimut Naalakkersuisoq, Agathe Fontain allappoq.
Unammillerneq
Aqqalu C. Jerimiassen Naalakkersuisumut apeqquteqarpoq kigutit nakorsaannik atorfinitsitsiniarnermut tunngasunik qanoq periusissiaqarnersut.
- Nunatsinni Nuna tamakkerlugu kigutigissaasoqarfik Avannaamioqatigiit sinneri kigutit nakorsaat pillugit unammilleqatigineqarput. Sumiiffinni amerlasuuni kigutit nakorsaannik amigaateqartoqarpoq, Peqqissutsimut Naalakkersuisoq, Agathe Fontain apeqqummut akivoq.
Agathe Fontainip aamma oqaatigaa nuna tamakkerlugu kigutigissaasoqarfiup nutarterneqarnera, assersuutigalugu 3D-scannerinerit siammarterneqarnerit aamma teknologiimik atuinerulerneq Nuna tamakkerlugu kigutigissaasoqarfiup unammillernermut uuttuutitut atorlugit anguniaraa.
- Kigutit nakorsaat attaveqatigiittarfinni ujartorneqartarpir, soorlu nunat avannarliit quppersagaanni. Aamma suliffinnik ilinniarfissanillu nittarsaassinerni sulisussarsiornernik peqataasarput. Nunami kigutit nakorsaat Kalaallit Nunaanni suliffissatut periarfissat ersarissartarpaat.
- Kigutit nakorsat ilaat Nuna tamakkerlugu kigutigissaasoqarfimmi atorfeqareersut
piffissami sivikinnerusumi nunap immikkoortuinut kigutit nakorsaqanngitsunut aallartinneqartarput. Tamanna aalajangersimasumik atorfilinnut aamma piffissami sivikitsumi atorfeqartunut atuuppoq.
