Kalaallit Nunaat Naalagaaffiit Peqatigiit suliniaqatigiiffianut ilaasortanngornissamik qinnuteqartoq
Kalaallit Nunaat Naalagaaffiit Peqatigiinni ataaniittumut Food and Agriculture Organisation (FAO)-mut, Savalimmiut assigalugu, peqataasartunngorusulluni qinnuteqassasoq Naalakkersuisut aalajangiuppaat.
FAO-mi ilaasortanngornissamut kissaateqarnerup tunuliaqutaa tassaavoq Kalaallit Nunaata Aalisarnermut Ataatsimiititaliami (COFI)-mi peqataasinnaasalernissaa, ilisimatitsissutigineqarpoq.
Assi: Leiff Josefsen
Naalakkersuisut Naalagaaffiit Peqatigiit ataaniittumi Food and Agriculture Organisation (FAO)-mi nunarsuaq tamakkerlugu aalisarnermut nunalerinermullu politikimut ineriartortitsinermut sunniuteqartalernissaq kissaatigaat.
Naalakkersuisut Naalagaaffiit Peqatigiit suliniaqatigiiffianut peqataasartutut ilaasortanngornissamik qinnuteqassallutik maajip arfineq-pingajuanni aalajangerpaat.
FAO-mi ilaasortanngornissamut kissaateqarnerup tunuliaqutaa tassaavoq Kalaallit Nunaata Aalisarnermut Ataatsimiititaliami (COFI)-mi, Nunalerineq pillugu suleqatigiissitami kiisalu Inuussutissalerinermi ajornartorsiutit pillugit suleqatigiissitap peqataasinnaasalernissaa:
- Kalaallit Nunaat Nunarsuaq tamakkerlugu aalisarnermut politikimut aamma aalisarnermik ingerlatsinermut, nakkutilliinermut, niuerutiginerinullu sunneeqataanissaanut, ineriartortitseqataanissaanut ilusilersueqataanissaanullu kinguneqassaaq, Aalisarnermut, Piniarnermut, Nunalerinermut Nammineerlunilu Inuutissarsiuteqarnermut Naalakkersuisoqarfik allappoq.
Savalimmiut peqataasartutut ilaasortaavoq
Nunat immikkoortuini Aalisarnermik Ingerlatsinermut kattuffinni, soorlu NAFO-mi aamma NEAFC-mi malittarisassat isumaqatigiissutillu suliarineqartartut a-merlasuut COFI-mit innersuussutinit aallaaveqarput Naalakkersuisoqarfik nassuiaavoq:
- Malittarisassat isumaqatigiissutillu taakkua Kalaallit Nunaata aalisarnermik aqutsineranut nakkutilliineranullu sunniuteqartarput, aalisariutinik nunanit tamalaaneersunit Kalaallit Nunaannut tulaassuisunik nakkutilliinermut imaluunniit ingerlatsinernut allanut nunani tamalaani piumasaqaatit aamma malittussaagatsigit. Taamaalilluni malittarisassat ilaannik nunarsuaq tamakkerlugu nammineq inatsisitsinnut ilanngussuinermik sulineq COFI-mi aallartissaaq, Nunat immikkoortuini Aalisarnermik Ingerlatsinermut kattuffinni nunat immikkoortuinut ingerlaqqissaaq kiisalu nunatsinnut ingerlaqqilluni.
- Kalaallit Nunaat nunat immikkoortuini taamaallaat maannakkut inissisimavoq.
FAO-mi ilaasortanngorneq aamma nunalerinermut, inuussutissat isumannaatsuunissaannut nunallu inoqqaavisa pisinnaatitaaffiinut kiisalu naasut sananeqaataasigut kingornuttakkanut tunngatillugu Naalakkersuisoqarfinnut allanut pingaaruteqarsinnaavoq.
Tamanna Kalaallit Nunaata nunanut allanut, isumannaallisaanikkut illersornissakkullu politikikkut periusissiaanut 2024-2033-mut aamma naapertuuppoq.
