- Nunanit tamalaanit tikeraartoqarnera alutornarpoq nuannerlunilu — allaat Donald Trump Jr.-imit, USA-mi præsidentinngortussap ernera ilaqutariit timmisartuannut Boeingimut ilaalluni Nuummut mimmat Kuno Fencker oqarpoq.
Kalaallit Nunaata Danmark USA-luunniit qinertariaqarnera pillugu Kuno Fencker erseqqissumik ima oqarpoq:
- Nunanit tamalaanit tikeraartoqarnera alutornarpoq nuannerlunilu — allaat Donald Trump Jr.-imit, USA-mi præsidentinngortussap ernera ilaqutariit timmisartuannut Boeingimut ilaalluni Nuummut mimmat Kuno Fencker oqarpoq.
Kalaallit Nunaata Danmark USA-luunniit qinertariaqarnera pillugu Kuno Fencker erseqqissumik ima oqarpoq:
– Kalaallit Nunaat kisimi Kalaallit Nunaannut oqartussaassuseqarpoq. Danmarkip USA-lluunniit oqartussaaffigilissanngilaat. Nunarput siunissarpullu pillugu nammineq aalajangiisussaavugut, erseqqissaavoq.
Tamannali isumaqanngilaq Kalaallit Nunaata suleqatini tunukkai:
– Danmark USA-lu kiffaanngissuseqartumik suleqatigilernissaannut isumaqatigiissusiorfiginissaat ammaffigaarput. Kalaallit Nunaata nunat taakku marluk qanimut suleqatigalugit namminersorluni oqartussaanini attatiinnarlugu. USA-mik suleqateqarnerup inerisaqqinnissaa kissaatigaarput, ilaatigut sillimaniarnermut, aningaasanut kulturimullu tunngatillugu.
Kalaallit Nunaata naligiimmik naalagaaffeqatigiinnermik pilersitsiniarluni Danmark arlaleriarluni saaffigisarsimagaa Fenckerip erseqqissarpaa:
– Naalagaaffeqatigiinnermik naligiinnermik ataqqeqatigiinnermillu tunngavilimmik pilersitsinissamik Danmarkimut arlaleriarluni siunnersuuteqarnikuuvugut. Danmarkilli pissutsit atuuttut attatiinnarusuppai, tassa inatsit tunngaviusoq qinerseqataaffiginikuunngisarput attatiinnarusullugu. Aamma naalagaaffiup qullersaanik ministeriunermillu qinersinermut sunniuteqarsimanngilagut. Tamanna tamat oqartussaaqataanerannik aallaaveqanngilaq, oqarpoq.
Aningaasatigut imminut pilersorneq
Kalaallit Nunaata namminiilivinnissaanut atatillugu aningaasaqarnikkut imminut napatissinnaaneq apeqqutaavoq pingaarutilik.
– Kalaallit Nunaat nammineq pisuussutini atorlugit aningaasaqarnikkut imminut pilersorsinnaalissaaq, Kuno Fencker oqarpoq, takornariartitsinerlu, aatsitassarsiorneq nukissiornerlu pingaarnertut aningaasarsiorfiusinnaasutut tikkuarlugit.
USA Danmarkilu Kalaallit Nunaanniinnerminnut naapertuilluartumik akiliisariaqartut aamma oqaatigaa:
– Kalaallit Nunaat USA-p isumannaatsuuneranut pingaaruteqarluinnarpoq nunarsuarmilu pingaaruteqarluni. Taamaattumik USA-p Danmarkillu aningaasatigut tapiissuteqarnerat Kalaallit Nunaata pingaaruteqarneranut naapertuunnissaa pissusissamisuuginnarpoq, oqarpoq.
Danmark nunasiaateqarsimasutut Naalagaaffiit Peqatigiit malittarisassai naapertorlugit pisussaaffeqartoq Fenckerip aamma erseqqissarpaa:
– Atugarissaarnermik inuiaqatigiinnilu aaqqissuussaanermik ineriartortitsinissamut Danmark Kalaallit Nunaata nammineersinnaalernissaata tungaanut aningaasaqarnikkut tapersersuinissamik pissuserissaarnikkut inatsisitigullu pisussaaffeqarpoq. Tamanna nunasiaateqarsimasutut akisussaaffiit ilagaat, namminiilivikkiartornitsinnilu Danmarkip pimooruttariaqarpaa, Fencker Sermitsiamut oqarpoq.
