Kalaallit Nunaat OL-imi skakkernermi nammineq erfalasoqarluni peqataasinnaalerpoq
Kalaallit Nunaanni skakkernermik kattuffik nunanit tamalaanit akuerineqarnialerpoq. Kalaallit skakkertartut OL-imi kalaallit erfalasuat atorlugu siunissami skakkernermi unammiuaarnerni peqataasinnaanngornerannik kinguneqassaaq. Tamanna siullermik 2026-mi pisinnaavoq.
Kalaallit skakkertartui OL-imi kalaallit erfalasuat atorlugu peqataasinnaalerput. Tamanna kalaallit skakkertartui nunani tamalaani akuerineqarnerata kingorna periarfissaalerpoq. Kalaallit Nunaanni Skakkertartut Kattuffiata nuannaarutigaa.
Assiliisoq: Nuuk Skak Klub
Skakkimi OL-ertoqarnerani tulliuttumi, 2026-mi pisussami, kalaallit unamminermi erfalasortik atorlugu peqataasinnaapput.
Kalaallit skakkertarnerat nunani tamalaani akuerineqarmat taamaaliortoqarsinnaalerpoq. Kalaallit Nunaanni Skakkertartut Kattuffiat tusagassiuutinut taama nalunaaruteqarpoq.
FIDE-p ukiut 100-nngortorsiorluni ataatsimeersuarnerani Kalaallit Nunaat ilaasortatut ilanngunneqarpoq.
- Kalaallit skakkertartuisa nunarsuarmi skakkernermi nunartik sinnerlugu peqataanissartik ukiorpassuarni takorluugaraat. Siornatigut FIDE-mit ilaasortanngornissamut piumasaqaatit sukannernerat pissutigalugu ilaasortanngornissamut itigartinneqartaraluarlutik, tunniutiinnannginneq nunanilu tamalaani skakkernermik suliaqartunik suleqateqarnerujussuaq oqaluttuarisaanermi pingaarutilimmik matuminnga kinguneqarpoq. Maanna naalagaaffeqatigiit tamarmik nunani tamalaani skakkernermik kattuffimmi kiisami ilaasortaqalerput, Kalaallit Nunaanni Skakkertartut Kattuffiat tusagassiuutinut nalunaarummi allappoq.
Skakkertartunut periarfissat nutaat
Nunani tamalaani skakkernerup silarsuaani akuerineqarneq kalaallit skakkertartuisa nunani tamalaani skakkernermik unammisitsinermi angusaqarluarnissaminnut periarfissaqarnerulersippaat.
Kalaallit Nunaat 2026-mi OL-imi nammineq erfalasuni atorlugu peqataasinnaavoq, taamaalillunilu skakkertartut suli maluginiarneqarnerulersinnaapput.
- Maanna nunat tamalaat unammiuaarnerinut peqataasinnaalerput, ilaatigut skakkernermi olympiademut ataqqisaasumut, kalaallillu erfalasuat atorlugu unammisinnaalerlutik. Tamanna skakkertartut pikkoriffiinik ineriartortitsinissamut periarfissamik ammaavoq, aammali nunat tamalaat suleqatiginerat nukittorsarlugu nunarsuarmilu timersornerup silarsuaani Kalaallit Nunaata malunnaateqarnerulernissaa anguniarlugu, kattuffik allappoq.
- Nunani tamalaani skakkertartut kattuffiannut ilanngunnerput tulluusimaarutigaarput, tassungalu atatillugu nunani tamalaani skakkertartut tapersersuinerat qujamasuutigalugu. Maanna 2026-mi skakkernermi OL-imi Tashkentimi, Uzbekistanimi illoqarfiit pingaarnersaanni, peqataanissarput qilanaaraarput, Kalaallit Nunaanni Skakkertartut Kattuffianni, KNSK-mi, siulittaasoq Carl Fleischer oqarpoq.
Islandimi skakkertartut klubbiata Hrókkurinnip tapersersuineratigut 2014-imi Kalaallit Nunaanni Skakkertartut Kattuffiat pilersinneqarpoq.
