Kalaallit Nunaat pillugu paasissutissiinerulertariaqarpugut

Qallunaat akornanni Kalaallit Nunaat pillugu ilisimasaqarneq kalaallit qallunaallu akornanni unammilligassat annersaata ilaattut taaneqarajuppoq. 

Tamanna kalaallit illuutaasa aaqqiissuteqaqataaffigissavaat.

Jeppe Bülow Sørensen, Kalaallit Illuutaanni Aalborgimiittumi pisortanngorlaaq, taama isumaqarpoq.

- Kalaallit Illuutaat pingasunik tunngaveqarput – isumaginninnermik, ilinniartitaanermik kalaallillu kulturiannik siammarterinermik. Siammarterinermilu annertuumik sunniuteqarsinnaavugut - qallunaammi Kalaallit Nunaat pillugu paasisaqarnerorusukkaangamik kalaallit illuutaat siulliullugit saaffigikkajuppaat.

- Aamma akuunerulersinnaavugut. Tamanna tunngavigalugu sapaatip-akunnerani kingullermi sisamanngornermi „Kalaallit Nunaat, Trump Naalagaaffeqatigiinnerlu“ qulequtaqaralugu oqallitsitsivugut, apeqquterpassuimmi maannakkut akissutiserusunneqarput, Jeppe Bülow Sørensen nassuiaavoq.

Kulturit assigiinngitsut naapittarnerat ajornakusoortoq

Oqallinnermi Lisa Bundgaard Jensen, Tunumi inunngorsimasoq ullumikkullu Morsimi ilinniartitsisuusoq, saqqummiivoq. Taamatut tunuliaqutarnermigut qallunaat kalaallillu naapittarneranni – nuannersunik nuanniitsunillu - misilittagarpassuaqarpoq.

- Angerlartariaqartunga aqqusinermi inuit ilaannikkut oqartarput. Qanorli taamaaliorsinnaavunga? Inuunerma annerpaartaa Morsimi najugaqarnikuuvunga – aamma kalaallisut oqallorinnerpaanngilanga, Lisa Bundgaard Larsen saqqummiinermini nassuiaavoq, tamannalu tusarnaartunut 100-t missaanniittunut sunniuteqarluarpoq – tamatumalu kingorna tusarnaariat apeqqutissarpassuaqarput.

Oqallinnermi Lisa Bundgaard Jensenip saqqummiinerata saniatigut kalaallit folketingimut ilaasortaatitaat Aaja Chemnitz (IA) aamma Socialdemokraatit Kalaallit Nunaat pillugu oqaaseqartartuat Flemming Møller Mortensen, politikkerinngunnginnermini Ilulissani peqqissaasuusimasoq, saqqummiipput.

Ataatsimiinnerit amerlanerussasut

Jeppe Bülow Sørensenip oqallinneq naammagisimaaramiuk Kalaallit Illuutaanni Aalborgimiittumi aaqqissuussinerit taamaattut amerlanerulernissaat pilersaarutigaa.

- Ataatsimiinneq qallunaatut ingerlanneqarpoq – uangalu aamma ataatsimiinnerit kalaallisut ingerlanneqartussat aaqqissuuttariaqarivut paasivara. Aamma Danmarkimi kalaallit naapeqatigiittarfiattut pingaaruteqarpugut – tassanilu oqaatsit pingaaruteqarput, Jeppe Bülow Sørensen oqarpoq.

- Ingammik maannakkut eqqissiviilliorfiungaartumi. Inuppassuit tusagassiuutitigut oqallinnerit sakkortuut, peqqarniitsumik oqalliseriaaseqarneq siunissarlu toqqissisimananngitsutut isigaat – taava ernumassuteqarnitsinni kalaallit allat avitseqatigisinnaallugit pulaarneqarsinnaasariaqarpugut.

- Taamaammat Kalaallit Illuutaannut Aalborgimiittumut tamanna aamma anguniagarissavara, pisortanngorlaaq oqarpoq.