Kalaallit Nunaat USA-mi pingasunngornermi eqqartorneqangaatsiassaaq
Senatori ataatsimiititaliamut Kalaallit Nunaat pillugu tusarniaanissamut aggersaavoq. Taassuma oqaatigaa amerikamiut piginnittuunissaat iluaqutissartaqartoq.
Pingasunngornermi ualikkut Senatimi ataatsimiititaliaq misissussavaa Kalaallit Nunaata pingaaruteqarnera amerikami aningaasaqarnermut nunallu isumannaatsuuneranut.
Assi: Sarah Meyssonnier/Reuters
Amerikamiut Kalaallit Nunaannik piginnittuulerpata USA aningaasaqarnikkut iluaqutissarpassuaqarumaarpoq.
Senator Ted Cruz, republikaneriusoq Texasimi qinigaaffimmeersoq taama isumaqarpoq. Oqaasiinik saqqummiussineq Amerikami Senatimi ataatsimiititaliami Kalaallit Nunaat pillugu tusarniaanissamut qaaqqusissummut atatillugu saqqummiunneqarpoq.
Tusarniaaneq pingasunngornermi nal. 10.00 aallartissaaq - nunatsinni nalunaaqutaq 13.00-nngorpat.
Ted Cruzip neriuutigaa tusarniaanermi paasissallugu Kalaallit Nunaata pigilerneratigut aningaasaqarnikkut nunarsuarmilu inissisimanermut qanoq iluaqutissaqartiginersoq.
- Isumaqarpunga tusarniaanermi matumani ersersinneqassasoq Kalaallit Nunaata nunarsuarmi politikkikkut pingaaruteqarnera annertusiartortoq, aamma sooq USA-p nunap immikkoortuata soqutiginninnera pisariaqarnersoq periarfissallu misissorneqartariaqartut, tusarniaanermut qaaqqusissummi allappoq.
Ataatsimiititaliaq tusarniaaffiusussaq niuernermut, ilisimatusarnermut angallannermullu tunngasunik suliaqarpoq.
Ted Cruz isumaqarpoq qeqertami pinngortitap pisuussutai Amerikamiut pilersuinermik ingerlatsinerannut suliffissuaqarnermullu iluaqutaasinnaasut.
- Qeqertap inissisimaffia nakkutilliiffissatut pingaaruteqarluinnarpoq, pingaartumik russit Kinamiullu sumiiffimmi sakkulersorneruleriartornerisa nalaani, Cruz allappoq.
USA-p præsidentiata Donald Trumpip decembarimi inuit attaveqaqatigiittarfianni Truth Socialimi Kalaallit Nunaannik aqutsilerlunilu piginnittunngornissaminik eqqarsaatiginninnini saqqummiummaguli Kalaallit Nunaannik piginnittuunermut apeqqutit oqallisaangaatsialerpoq.
Kingornatigut arlaleriarluni qeqertaq pigilerusullugu nalunaartarpoq.
- Isumaqarpunga pissarsiariumaarlutigu, præsidenti CNN-imit januaarip naanerani apersorneqarami oqarpoq.
Nangilluni oqarluni Kalaallit Nunaanni innuttaasut 57.000-ingajaat ’peqataarusuttut’.
Trumpip pilersaarutaa Senatimiinnaanngitsoq soqutigineqartorujussuuvoq.
USA-mi kongressimi inatsisartut aappaanni, USA-mi inatsisartunut ilaasortamit Earl „Buddy“ Carterimit, præsidenti tapersersorneqarpoq.
Republikaneri inatsisissatut siunnersuuteqarpoq Donald Trumpip Kalaallit Nunaat pisiarinissaanut akuersissuteqartussamik imaqartumik, kingornalu qeqertaq nutaamik ateqalissalluni: Nuna Aappalaartumik, Qaqortumik Tungujortumillu Qalipaatilik (Red, White, Blueland, red.)
- Præsident Trumpip eqqortumik oqaatigaa ullumikkut Kalaallit Nunaata pisiarinissaa nunap isumannaatsuunissaanut pingaaruteqartoq, Buddy Carter tusagassiuutinut nalunaarummi allappoq.
Inatsisartuni siunnersuuterpassuit suliarineqartarput, ikittuinnaalli inatsisinngortinneqartarlutik.
Carterip siunnersuutaa qanoq tapersersorneqartiginersoq ilisimaneqanngilaq.
Donald Trumpip præsidentitut siullermik atuuffimmini 2019-imi Kalaallit Nunaata pisiarinissaa siullermeerluni eqqartorpaa.
Præsidentip Kalaallit Nunaannik aqutsinissamik kissaateqarnera naalakkersuisut siulittaasuannit Múte B. Egedemit ministeriunermillu Mette Frederiksenimit (S) itigartinneqarpoq.
