KL

DK

Kalaallit Nunaata namminersulernissaa folketingip akornusissagaa Wammenip takorloorsinnaanngilaa

Kalaallit Nunaanni nalornisigineqassanngilaq Danmarkip naalagaaffeqatigiinneq kissaatigigaa, Nicolai Wammen oqallinnermi oqarpoq.

Partiit siulittaasuisa oqallinnerat Radikale Venstrep politikkikkut siuttua Martin Lidegaard, danskit aningaasaqarnermut ministeriat Nicolai Wammen (S) aamma Liberal Alliancemi partiip siulittaasua Alex Vanopslagh, Hotel Nyborg Strandimi, Radikale Venstrep sapaammi ukiumoortumik ataatsimiinnerani.
ritzau
Saqqummersinneqarpoq

Kalaallit Nunaat namminersulivikkusuppat, Socialdemokraatit Folketingimi akerliunavianngillat, danskimmi Folketingiat Kalaallit Nunaata namminersulivinnissaanut akuersissummik tunisisussaavoq.

Taama paasineqarsinnaasumik oqarpoq aningaasaqarnermut ministeri Nicolai Wammen (S), sapaatip akunnerata naanerani Socialdemokraatit sinninerlugit De Radikalit ileqqortik malillugu ukiortaami ataatsimiinneranni Nyborgimi partiit siulittaasuisa oqallinneranni peqataasoq.

- Danskit Folketingianni amerlanerussuteqartut Kalaallit Nunaata aalajangigassaanik akornusersuisinnaassasut takorloorsinnaanngilara, Wammen oqallinnermi oqarpoq, tassanilu aamma Radikalit politikkikkut siulittaasuat, Martin Lidegaard, aamma Liberal Alliancemi partiip siulittaasua, Alex Vanopslagh, peqataapput.

Ulluni kingullerni Kalaallit Nunaat pillugu oqallinneq annertuumik ingerlanneqarpoq, partiillu taakku pingasut siulittaasuisa amerlanertigut isumaqatigiipput.

Partiit siuttui taakku pingasut arlaannaataluunniit kissaatiginngilaa Kalaallit Nunaat naalagaaffeqatigiinnerup avataanut inississasoq.

Kisianni Kalaallit Nunaanni innuttaasut namminersulernissamik siunnerfeqassappata, Folketingimi "soorunami inatsit nammineq sanagatsigu ataqqisariaqarparput", Alex Vanopslagh oqarpoq.

Namminersorneq pillugu inatsimmi erserpoq Kalaallit Nunaata namminersulernissamik aalajangertoqassappat, tamanna Kalaallit Nunaanni innuttaasunit aalajangerneqassasoq. Kalaallit Nunaata naalakkersuisuisa Danmarkillu naalakkersuisuisa akornanni Kalaallit Nunaata namminersulernissaanik isumaqatigiissuteqartoqassappat, taava Kalaallit Nunaanni innuttaasunik taasititsisoqareerpat akuersissutigineqassaaq.

Taamaattorli aamma isumaqatigiissut taamaattoq Kalaallit Nunaanni Danmarkimilu inatsisartut akuersinerisigut pisussaassaaq.

Taamaattumik oqallinnnermi peqataasut taakku pingasut arlaannaataluunniit takusinnaanngilaat  Folketingi Kalaallit Nunaata namminersulernissaanut akornutaasinnaassasoq.

Nicolai Wammenip oqallinnermi arlaleriarluni uteqqippaa Kalaallit Nunaata siunissaa Københavnimi aalajangerneqassanngitsoq, kisianni kalaallit nammineq aalajangissagaat. Taamatut oqariartuuteqarpoq ministeriuneq Mette Frederiksen (S) arlaleriarluni, USA-p præsidentisaata, Donald Trumpip, Kalaallit Nunaannut aqutsinissamik soqutiginninnera tunngaviglaugu.

- Uagut kissaatigaarput naalagaaffeqatigiinnerup ineriartortinneqarnissaa, atorunnaarsinneqarnissaajunngitsoq, Wammen taamak oqarpoq.

- Kalaallit Nunaanni nalornissutigineqassanngilaq, uagut naalagaaffeqatigiinneq kissaatigaarput.

Martin Lidegaard oqarpoq, "annertoorujussuarmik annaasaqaataassasoq" Kalaallit Nunaat annaaneqassappat.

- Tamanna ersarippoq. Inuttummi aamma tamana ersarippoq.

Alex Vanopslaghip aamma takorlooruminaatsippaa USA-p akisussaaffik tigussappagu tamanna oqiliallannartuussasoq.

- Naamik, takorloorpara annaasaqaataassasoq, Kalaallit Nunaat Kunngeqarfiup naalagaaffeqatigiinneraniit aniguni. Tassa oqaluttuarisaanermik, suleqatigiinnermik kulturimillu ataatsimoorussamik annaasaqarnerussaaq.

- Isumaqarpunga uagut ilungersorluta anguniartariaqaripput, kalaallit naalagaaffeqatigiinnermiiginnarnissaminnik kissaateqalersillugit.

rigsfællesskabet radikale venstre nicolai wammen martin lidegaard liberal alliance inuiaqatigiit alex vanopslagh socialdemokratiet selvstændighed samfund

ATORFIIT Se alle jobs

Powered by Labrador CMS