Kalaallit qallunaallu suleqatigiinnerat nalunaarusiami inaarutaasumi killiffissiorneqartoq
Nalunaarusiami nutaami Kalaallit Nunaanni meeqqat inuusuttullu pillugit suliniutit, danskit oqartussaasuinik assigiinngitsunik suliaqartunik ukiuni arlalinni suleqateqarnerup kingorna, sammineqarput. Anguniakkat arlallit anguneqarsimapput, aammali suleqatigiinneq pillugu kommunini assigiinngitsunik qisuariartoqarpoq.
Isumaqatigiissut 2019-imi isumaginninnermut ministeriusimasumit Astrid Kragimit isumaginninnermullu taamani naalakkersuisumit Martha Abelsenimit atsiorneqarpoq.
Kassaaluk Kristiansen
Naalakkersuisut meeqqat inuusuttullu pillugit isumaginninnerup nukittorsarnissaanut Danmarkimut 2019-imi aasakkut ikioqqupput. DR-ip Tasiilami inuusuttut pillugit piviusulersaarusiaata ’Byen hvor børn forsvinder’-ip (illoqarfimmi meeqqat peeruffianni aaqq.) oqallisaaqisup kingorna Inatsisartut ikioqqunissamik piumasaqaqqusereersullu ikiorneqarnissamik noqqaasoqarpoq.
Kalaallit qallunaallu suleqatigiinnerat taamanikkut aallartittoq pillugu inaarutaasumik nalunaarusiaq maanna saqqummersinneqaqqammerpoq. Tassanilu siunissaq ungasinnerusoq eqqarsaatigalugu suliniutit 16-it 2020-mi siunniunneqartut sammineqarput.
Siusissukkut iliuuseqarnerit pitsaanerusut, pinaveersaartitsinerit, kommunit meeqqanik inuusuttunillu sullissinerisa pitsanngorsarneqarnerat, meeqqanut inuusuttunullu atugarliortunut neqeroorutit amerlanerusut aamma kinguaassiuutitigut atornerlunneqarsimasunut iliuuserineqartut pitsaanerulernissaat, kiisalu inersimasunut kinguaassiutitigut kannguttaatsuliornermik pissusilersortartunut katsorsaanermik sullissivimmik pilersitsinissaq.
Suleqatigiissitaq aallaqqaammut ilikkagassarpassuaqartoq nalunaaruteqarpoq, suliniutilli amerlanertigut anguniakkat malillugit ingerlanneqarsimallutik.
Aningaasat kisimik naammanngillat
Kommunit aallaavigalugit inerniliussat ilaat:
- Kommunit assigiinngitsunik aallaaveqarsimapput, tamannalu Kalaallit qallunaallu oqartussaasoqarfiisa assigiinngitsunik suliallit akornanni suleqatigiinneranni peqataanerannut aamma sunniuteqarsimalluni. Ilaatigut isumalluutit pigisaat suliakkiutigineqarsimasullu apeqqutaasimapput. Pisut ilaanni naammagisimaartorujussuusimapput allanilu naammaginninngilluinnarlutik
- Kommunini sullissisut Danmarkimi suleqatiminnik issiaqateqarluni ilinniartinneqarnertik nuannaarutigisimavaat, akerlianilli aqutsisut pissutsit tungaatigut qaangerniagassaqarsimallutik.
- Aningaasaqarnikkut isumalluutit naammannissaat pisariaqarpoq, kisianni isumaginnittoqarfimmi piffissaq ungasinnerusoq eqqarsaatigalugu aaqqiissuteqarnissamut aaqqissussaanikkullu allannguinissamut imaanngilaq naammattut.
- Kalaallit qallunaallu oqartussaasoqarfiisa assigiinngitsunik suliallit akornanni suleqatigiinneranni isumasioqatigiinnerit, workshopertitsinerit, pikkorissaanerit il.il. aamma amerlanerujussuanngorsimapput, tamannalu kommunini isumalluutit amerlasuutigut eqqarsaatiginagit ingerlanneqarsimallutik
- Misilittakkat, ilikkakkat qaangerniagassallu qanoq ikkaluarpataluunniit kalaallit qallunaallu oqartussaasoqarfiisa assigiinngitsunik suliallit akornanni suleqatigiinnerisa Kalaallit Nunaanni meeqqanut inuusuttunullu atugarliortunut suliniutinut pitsanngorsaaqataavoq, katsorsaanermik neqeroorutinik, pinaveersaartitsinermik iliuuseqarnernik isumaginninnermilu sakkunik pingaarutilinnik ineriartortitsinermik.
