Kalaallit qimmiat qimuttoq pissuseqatigiiaanni pisoqaanerpaaq – Guinness Rekordbogimi allassimalerpoq
Kalaallit qimmiat nunarsuarmi qimmit pisoqaanersaraat. Kalaallit qimmiat nunarsuarmi qimmit pisoqaanersaraat, tamannalu Guinness Rekordbog 2026-mi saqqummersinneqartumi allassimavoq, tamannalu kalaallit qallunaallu Qimmeq suliniutaasa Ilisimatusarfimmiittup inerneri tunngavigalugit pivoq. Qimmeq suliniut taama ilisimatitsivoq.
Assi: Tôrtia Reimer-Johansen
Qimmeq, kalaallit qimmiat nunarsuami qimmini pissuseqatigiiaanni pisoqaanersaavoq.
Qimmeq qimuttutut ilisimaneqartoq pisoqaanerpaatut Guinness Rekordbogimi 2026-mi ilanngunneqassaaq.
Qimmeq-mik suliniummik ingerlatsisut tusagassiuutinut nalunaarummi allaatigaat suliniummi peqataasut assigiinngitsorpassuarnik ilinniagallit, soorlu uumasut nakorsaat, qimussertartut, ilinniartitsisut, filmiliortartut assiliisartullu, tamarmik ataatsimut anguniagaqartut: Qimmeq, qimussernermik ileqqutoqqat, qimmit pilerfiat tamatumalu Kalaallit Nunaanni immikkuullarissumik pingaaruteqarnera allaatiginissaat.
Qimmeq qimuttoq maluginiarneqartoq
- Ukiut ingerlaneranni suliniut saqqummiunneqarlunilu siammarterneqarsimavoq, angusat takuneqarsinnaasimapput. 2024-p naalernerani Qimmeq-mik suliniut Guinness Rekordbog-imit attaveqarfigineqarpoq, tassanilu kalaallit qimmiat qimuttut nunarsuarmi qimmit pisoqaanerpaat allattorsimaffiannut ilanngunneqarsinnaanera eqqarsaatigineqarmat.
- Misissuinerit pillugit suliniummik ingerlatsisut oqaloqatigereerlugit, qimmeq nunarsuarmi qimmit pisoqaanerpaat ilaattut Guinness Rekordbogimi 2026-mi saqqummersussani ilaasussatut toqqarneqarsimavoq.
Itsarnisarsiornermi nassaat dna-millu misissuinerit tunngavigalugit ilisimatuut uppernarsarsinnaavaat kalaallit qimmii qimuttut Sibiriami qimmit qimuttut ukiut 9500-t matuma siorna piaqqiaasut eqqarlerigaat, aamma inuit ukiut 1000-t matuma siorna Beringstrædekkut Kalaallit Nunaannut nassartarsimagaat.
