Nunatsinni suminngaanneeraluarutta – annerusumik
minnerusumilluunniit – Danmarkimullu feeriarluta, sulinermut atatillugu
imaluunniit niuerneq pillugu angalatilluta Kangerlussuarmut
aqqusaaqqaartuaannartarsimavugut.
Aqqusaarneq pisariaqartoq,
pisuttualaarnissamut, akunnittarfiup nerisarfiani ullup qeqqasiornissamut
imaluunniit aallaqqinnginnermi sulipallannissamut periarfissaqartitsisimasoq.
Nunatsinni suminngaanneeraluarutta – annerusumik
minnerusumilluunniit – Danmarkimullu feeriarluta, sulinermut atatillugu
imaluunniit niuerneq pillugu angalatilluta Kangerlussuarmut
aqqusaaqqaartuaannartarsimavugut.
Aqqusaarneq pisariaqartoq,
pisuttualaarnissamut, akunnittarfiup nerisarfiani ullup qeqqasiornissamut
imaluunniit aallaqqinnginnermi sulipallannissamut periarfissaqartitsisimasoq.
Meeqqat mikigallarmata Kangerlussuaq pingaarnertut feeriap
aallartinneranut ilaasimavoq. Jyllandimi aasarsiortarfimmi sapaatit akunnerini
sisamani-tallimani feeriarnissap, biilerluni angalanissat misigisaqarnissallu
qilanaarnartui timmisartorsuarmut ikinnginnermi ernitta aallaamasut
pinnguartarfimmi nukinnik atuinissaannik aallartittarsimapput.
Takorniornerit qanorlu innermik oqaluttuapallanerit
Inuppassuaqartarpoq feeriarlutik aallartunik imaluunniit feeriareerlutik
angerlartunik. Ilaquttanik, ikinngutinik ilisarisimasanillu sivisuumik
takusimanngisanik naapitsinissamut periarfissiisarpoq. Takorniornerit, qanoq
innermik oqaluttuapallannerit takoqqinnissallu tungaanut inuulluaqqusinerit
pisarput. Aqqusaarnerit taakku nuannersumik qilanaarisaqarlunilu
misigisaqarnermik eqqaamasarpakka.
Kangerlussuaq piffissap ingerlanerani aamma
ornitassaasarsimavoq ataatsimiigiartussaasimaguma
ataatsimeersuariarlungaluunniit imaluunniit sulinermut niuernermulluunniit
atatillugu angalatillunga aqqusaartarsimallugu. Taakkunani e-mailit
alakkarternissaat ingerlaqqinnginnermilu suliassanik isumaginnipallannissaq
pingaaruteqartarsimapput – soorunamilu kaffisornissaq immaqalu tamussernissaq.
Angalanerit assigiinngitsut taakku assigiissutigaat
ingerlaarama. Angalaneq nuannareqaara ornitarlu uannut apeqqutaavallaanngilaq,
angalagaannimi ulluinnarni atukkat taarserlugit allanik misigisaqarnissamut
immaqalu alutornartumukarnissamut ingerlaarneruvoq. Imaluunnit angerlamut
angalaneruvoq angerlarsimaffigisami toqqissisimanartumi ilaquttat namminnerlu
igaat qilanaaralugit.
Silaannarik panertoq
Ukiukkut angalasimatillunga timmisartorsuarmit niunini
silaannarissumik panertumik anersaarneq nuannarisaqaara, ississimatillugu
sorlunnik milikartitsisumik. Issinnerata amermut kakillaalutsitsinerata
isaarissallu tungaanut quasarnerata qungujulaartittarpaanga avatangiisinillu
isiginnaarlunga.
Misigisimasat tamakku aqqusaarpaannga LinkedInimi
Kangerlussuaq pillugu allanneqarsimasoq atuarakku. Kangerlussuup
naapittarfiunera Nuummi mittarfiup sisamanngornermi ammarneqarnerani
allanngortussaq.
Ineriartorneq pissusissamisoortoq
Kalaallit Nunaanni illoqarfiit pingaarnersaanni nunanut
tamalaanut nutaamik mittarfeqalernera amerlasuunit isummersorfigineqarpoq.
Isumaga malillugu nalinginnaasumik ineriartorneruvoq, angalasorpassuarnullu
Nuummiit Danmarkimut killormulluunniit angalasunut sivikinnerusumik
angalasalernermik nassataqartussaq. Sunniivigeqatigiinneq angalariaatsillu
tamarmik allanngussapput.
Kalaallit Nunaata sinneranit angalasunut Kangerlussuarmi
akunniffissaq Nuummut nuunneqassaaq. Tamanna angalasunut nunatsinnullu
pitsaasuussanersoq ajortuussanersorluunniit nalilersinnaanngilara.
Kangerlussuarmi, Nuummi nunallu sinnerani takornariaqarnermut
inuussutissarsiutillu ineriartornerannut qanoq isumaqassanersoq aamma naluara.
Tamanna ilisimasalinnit oqallisigineqassaaq piffissallu takutikkumaarpaa qanoq
issanersoq.
Nerisarfimmi utaqqisarfinnilu qanoq innera atlantiku
qulaallugu timmisartut mittarfiata Nuummut nuunneqarnerani aamma nuussanersoq
pissangagiinnarpara. Angalasut tikittut ingerlaqqinnissamik utaqqisut
uniffigisassanerpaat ilassiorlugillu imaluunniit tuaviinnaq
angerlartassanerpat?
Ingerlaqqipallattassagunarput. Kisianni qilanaarivara
Nuummut toqqaannartumik angalanissap misiginissaa. Kangerlussuarmut
aqqusaaqqaarnermut kulturi atuussimasoq maanna allanngorpoq, tamannalu
misigerusuppara. Angalanermi inuuneruvoq.
