Kangerlussuarmi inuulluaqqusineq killitsinnartoq: Innuttaasut nuunnginnerminni eqqaassutissaliortut

Kangerlussuarmi inussuk nutaaq takussaalerpoq. Inussuk killitsinnartumik oqaluttuassartalik.

Inussuup immikkuullarissutigaa ujaqqat nunaqarfimmi ukiorpassuarni najugaqarsimasunit illoqarfimmut allamut nuuttariaqalersimasunit iliorarneqarsimammata. Mittarfeqarnerup allanngortussaanera peqqutaalluni.

Inussuk, maanna eqqaassutissaasoq ujaraannaanngilaq. Kangerlussuarmi najugaqarsimasut, oqaluttuaasa, inuuneranni misigisimasaasa misigissusaasalu katersuuffiat.

Ujaqqat, ilaqutaasuniit, ikinngutaasunit, sanilerisaniit, Kangerlussuarmi inuunerisamit ilioragaapput.

- Siullermik qujavunga takkussinnaagassi, nalunngisatsitullu sulisorpassuit ilaqutaasullu nunannguaq uummateqarfigilluagarput qimattussanngorparput.

- Tassungalu atatillugu takorloorsimavara innuttaasunut piumasunut tamanut ataatsimoorussamik "eqqaassutissannguamik/qujassutissannguamik" inussummik sanasoqarnissaa, tassalu taanna piviusunngorpoq. 

- Nalunngisatsituut suleqatigut ilai Ilulissiartussaapput ilaalu Nuummut nutsertussaapput, taakkulu nunannguarlumi manna qamuuna uummatitsinnut toqqortarilertussaavagut. Oqartarnitsitut nunannguami maani toqqissisimaffigisarput, qimattussanngornera tamatsinnut qamuuna aalassassutaavoq, ukiup ingerlanerani nuannersorpassuarnut, ikinngutigilikkat, nalunngisarilikkat, suleqatillumi nuannersunut tamassinnut qujarusuppunga, eqqaassutsissaliornissamit isumassarsisoq, Aningaaq Heilmann oqalugiarnermini oqarpoq.

Aaqqissuussaq killitsinnartoq

Qaqqami inussuliortoqareersoq Multihusimi kaagisortoqarlunilu kaffisortoqarpoq, aamma taallanik atuaasoqarlunilu erinartoqatigiittoqarpoq.

Rina Nielsen ilaquttanilu aaqqissuussami peqataapput. Taakkumi ilaqutariiullutik nuuttussanut ilaapput:

- Eqqumiippoq nuuttussat amerlangaarmata. Killitsinnarpoq, aliasuttoqarpoq. Aallartussat naggataamik peqatigaagut.

Ilaqutariinnerup aallartiffia

Rina Nielsen ukiut qulingiluat matuma siorna kisimiilluni Kangerlussuarmut nuuppoq. Ukiut qulingiluat ingerlanerani aappanilu marlunnik meerartaarput, maanna arfinilinnik pingasunillu ukioqartunik.

- Kangerlussuaq meeqqallu toqqissisimaffigaarput. Meeqqanut toqqissisimanartoq. Maanga kisima nuuppunga, maani ilaqutartaarpunga.

Rina mittarfimmi Namminersorlutik Oqartussat ataanni ilanngaaserisutut sulivoq. Maanna nunaqarfik ilaqutariilerfitsik qimattussanngorpaat. Ilaquttanilu Ilulissanut nuussapput, atorfini atorfigiinnarlugu.

- Inigisarput septembarip aallaqqaataata missaani imaarneqarpoq. Maanna pisattagut tamarmik Ilulissaniipput. Aallaqqaammut imaarmassuk misigissuseqanngilanga. Maannakkulli arlallit inigisaat poortorneqalermata misigissutsikka assigiinngillat.

- Kamaqqavunga, aliasuppunga, pissangavunga. Qilanaarpunga, kisiannilu aamma qilanaarnanga. Misigissutsikka arlaliupput Rina Nielsen Sermitsiamut oqaluttuarpoq.

Inussuk ullorissap, juullikkunni ikinneqartartup ataani Mickey Mousep qaqqaaniippoq. 

Rina Nielsen ujaqqamik ilisivoq.

- Nunarujussuaq kusanartoq, silagittuaannartoq meeqqanullu toqqissisimanartoq qimalerlugu artornarpoq, Rina Nielsen oqaluttuarpoq, naggaserlugulu. 

-  Maani nalunngisarilersimasat ikinngutit nuuttussat siunissamik ajunnginnerpaamik kissaallugit inuulluaqquagut.