Kangerlussuarmi umiarsualiviliorneq ukiuni arlalinni ingerlasinnaavoq
Pisariaqartitsinerit maannarpiaq atuuttut pisariaqavissullu iluarsiiviginiarlugit nutaamik umiarsualiviliornissamut pilersaarusiornissamullu misissuinerit ukiuni arlalinni ingerlanneqartussaapput. Umiarsuit aqqutaata sioranittarnera suliniummik unammillernartitsivoq, taama Inatsisartunut ilaasortamut akissuteqaamminni Naalakkersuisut allapput.
Tininnganerani umiatsiaaqqat nunamullu assartuutit Kangerlussuup talittarfianukarsinnaaneq ajorput, sermersuarmit sioqqat kuuttut pissutigalugit. (Toqqorsivimmit).
Assi: Sikuki Harbour
Ukiorpassuarni tissiartaatit umiarsuillu anginerusut Kangerlussuup talittarfia tikikkuminaatsittarpaat. Umiarsuit aqqutaata sioranittarnera pissutigalugu aserfallatsaaliorneqartuartariaqarpoq.
Umiarsualiviit nutarterneqarnissaat, ilaatigut Kangerlussuarmi umiarsualivimmik nutaamik sanaartornissaq, pisariaqartinneqangaarpoq. Kangerlussuarmili umiarsualivimmi atuisut umiarsualivimmik nutaamik qanoq sivisutigisumik utaqqisariaqarpat? Tamanna pillugu Inatsisartunut ilaasortaq Hans Enoksen (N) Naalakkersuisunut apeqquteqarpoq.
- Pisariaqartitsinerit maannarpiaq atuuttut pisariaqavissullu iluarsiiviginiarlugit nutaamik umiarsualiviliornissamut pilersaarusiornissamullu misissuinerit ukiuni arlalinni ingerlanneqartussaapput. Taamaattumik maanna umiarsualiviusumik atuisut maannarpiaq pisariaqartitaannut piareersisoqarnissaa pingaarnertut aallunneqarsimavoq.
- Umiarsualivik maanna atorneqartoq pillugu suliat naammasseriarpata, siunissamilu pisariaqartitat paasineqariarpata, Kangerlussuarmi nutaamik umiarsualiviliornissamut suliat Naalakkersuisut ingerlateqqissavaat, inatsisartunut ilaasortap Hans Enoksenip paragraf 37 naapertorlugu apeqqutaanut akissummini attaveqaasersuutinut naalakkersuisoq Hans Peter Poulsen taama allappoq.
Naliliinerit naammanngitsut
Kangerlussuarmi umiarsualivittaassamut 4 millionit koruunit immikkoortinneqarput. Taakkunannga 400.000 koruunit aallarniutaasumik misissuinernut atorneqarput. Aningaasat sinneri suli suliassamut atugassatut immikkoortitaapput, allassimavoq.
2020-mi aamma 2022-mi pilersaarusiornissamut piareersaatitut nalunaarusiortoqarpoq.
Tunngaviusumik nutaamik umiarsualiviliortoqartariaqarnersoq, inuiaqatigiillu aningaasaqarnerannut kingunerisassaat nalunaarusiami naliliiffigineqarput.
- Suliassap aallartinnissaanut naliliinerit naammassimanngillat, nutaamik umiarsualiviliortoqartariaqarneranut naliliineq pillugu allaqqavoq.
Inuiaqatigiit aningaasaqarnerannut qanoq kinguneqassanersoq pillugu misissuisoqaqqittariaqartoq Hans Peter Poulsen akissummini nangilluni allappoq:
- Aningaasaqarnermut Akileraartarnermullu Naalakkersuisoqarfik naliliivoq, umiarsualiveqarfiup siunissami ingerlanneqarnissaanut periarfissat pillugit isummersuutinik tamakkiisunik ilaatitsisoqanngitsoq. Taamaattumik suli Kangerlussuarmi nutaamik umiarsualiviliortoqassappat iluaqutissat akornutissallu inaarutaasumik naliliiffigineqarnerat amigaataavoq, akissutaani allassimavoq.
Nalorninartut arlallit pissutigalugit umiarsualivimmik nutaamik sanaartorneq qaqugu aallartissanersoq suli aalajangerneqanngilaq.
