KL

DK

Kangerlussuarmi umiarsualivimmut akitsuutit misissorneqarput

Aningaasaqarnermut akileraartarnermullu naalakkersuisup Erik Jensenip inatsisinik allannguisoqarsinnaanera misissorpaa

Naalakkersuisoq for finanser og skatter Erik Jensen: – Jeg har nu bedt mit departement indlede en dialog med Sikuki Nuuk Harbour A/S om en eventuel lovændring af havneafgiften i Kangerlussuaq.
Aningaasaqarnermut Akileraartarnermullu Naalakkersuisoq Erik Jensen: - Kangerlussuarmi umiarsualivimmut akitsuutip inatsimmik allanngortinneqarsinnaanera pillugu Sikuki Nuuk Harbour A/S oqaloqatigeqqullugu Naalakkersuisoqarfiga qinnuigaara.
Poul Krarup Freelance Tusagassiortoq
Saqqummersinneqarpoq

Kangerlussuarmi talittarfiup atornissaa nunami umiarsualivinnit allanit akisunerujussuunera, ingammik Nuup talittarfianut sanililliullugu, Qeqqata Kommuniani borgmesterip Malik Berthelsenip (S) Sermitsiamut naammagittaalliutigaa.

Allaaserisaq atuaruk: Kangerlussuaq nunatsinni umiarsualiviit akisunersaat

Parteeqataata, aningaasaqarnermut akileraartarnermullu naalakkersuisup Erik Jensenip, borgmesterip maalaarutaa tusaasimavaa. Tusagassiorfimmullu Sermitsiamut ilisimatitsissutigaa naalakkersuisoqarfiata Sikuki Nuuk Harbour A/S tamanna pillugu saaffigisimagaa, taakkualu akissutaat maanna utaqqineqartoq.

Erik Jensenip aamma qanoq pisoqarsimanera nassuiarpaa, taamaalillunilu umiarsuarnut takornariartaatinut Nuummi Kangerlussuarmiit ilaasunik taarsersuinissaq akikinnerummat Nuuk iluaqutissarsiffiginiarlugu piaaraluni iliuuseqartoqarsimaneranik pasilliineq ilumuunnginnerarlugu. 

Albatros Arctic Circlemi pisortap Jørgen Larsenip taamaattoqarnerarpaa. Jørgen Larsen ukiorpassuarni Kangerlussuarmi umiarsuarnik takornariartaatinik ilaasunik taarsiinermik suliaqartarsimavoq, maannalu ernummatigaa akit assigiinngissutaata kingunerisaanik umiarsuarni takornariartaatini ilaasunik taarsiinerit Nuummi pisalissasut Kangerlussuarmiunngitsoq.

2023-mi akuersissutigineqartoq

Inatsisartut 2023-mi ukiakkut ataatsimiinneranni umiarsualivinni umiarsuarnillu takornariartaatinik ilaasunut akitsuutit allanngortinneqarmata assigiinnginneq pilersimasoq Erik Jensen ilisimatitsivoq.

Allannguutigineqartup ilaatigut kinguneraa umiarsuarnik takornariartaatinik 30.000 bruttotonsit tikillugit oqimaassusillit umiarsualivinnut arlalinnut tulakkaangamik 1,10 koruuninik akitsuuserneqarnerat, umiarsuarnillu takornariartaatinik 30.000 bruttotonsit sinnerlugit oqimaassusillit 2,20 koruuninik akitsuuteqalernera.

Nuummi umiarsualivimmut tulakkaangamik akitsuut annikinnerujussuuvoq. Umiarsuit takornariartaatit 30.000 bruttoton tikillugu oqimaassusillit Nuummi umiarsualivimmut akitsuuteqanngillat, umiarsuilli takornariartaatit 30.000 bruttoton sinnerlugit oqimaassusillit Nuummi umiarsualivimmut tulakkaangamik akitsuut tonsimut 0,70 koruuni akilissavaat.

Sikuki oqaloqatiginiaraa

– Nuummi umiarsualivimmut tulanermut akitsuutip appasinneranut pissutaavoq Sikuki Nuuk Harbour A/S-ip Nuummi umiarsualivimmi atuisunut akiliuteqartitsisarmat. Umiarsualivinni allani taamaanngilaq. Taamaattumik umiarsualiviit assigiimmik unammillersinnaanissaat qulakkeerniarlugu Nuummi umiarsualivimmut akitsuut appartinneqarpoq, Erik Jensen nassuiaavoq, nangillunilu:

– Sikuki Nuuk Harbour A/S-ip Kangerlussuarmi umiarsualivimmik ingerlatsinermik tigusinissaa 2023-mi ukiakkut naalakkersuisoqarfimma eqqarsaatersuutigaa. Paasissutissalli naammassimanngillat, tigusinermi aningaasanut tunngassusillit ilanngullugit,

– Maannakkut tigusinissaq piviusunngormat, ilaatigut aningaasaqarnikkut atugassarititaasut pillugit paasissutissanik amerlanerusunik peqalermat, naalakkersuisoqarfima Sikuki Nuuk Harbour A/S oqaloqatiginiarlugu inatsisinik allannguisoqarsinnaanera pillugu qinnuigaa, Erik Jensen Sermitsiamut oqarpoq.

havneafgifter erhverv krydstogtskibe inuiaqatigiit nuuk havn kangerlussuaq sikuki nuuk harbour a/s

ATORFIIT Se alle jobs

Powered by Labrador CMS