KANUNUPE-mi siulittaasoq: - Nunaqarfinni aqutsisut oqartussaaffi annertunerusariaqarput

Nunaqarfiit peqatigiiffianni KANUNUPE-mi aamma Qeqertarsuatsiaani Kapisilinnilu nunaqarfinni aqutsisuni siulittaasoq Ingvar Motzfeldt naapertorlugu ukioq manna nunaqarfinni aqutsisunut qineqqusaartut ukiut siulii assigalugit amerlapput.

Kisiannili Kalaallit Nunaanni nunaqarfinni 56-iusuni ineriartortitsineq kigaappallaartoq, taamaattumillu nunaqarfinni aqutsisut akisussaaffimmik anginerusumik tunineqartariaqartut, taanna isumaqarpoq.

Sunniuteqarsinnaaneq annikippallaartoq

Kommunit nunaqarfinnut aningaasaliissutaat aamma bygdepuljenik taaneqartartut, nunaqarfinni aqutsisunit aqunneqartarput, taakkualu amerlanertigut nunaqarfimmi kulturikkut aaqqissuussanut allanullu tassunga assingusunut atorneqartarput. Tassa imaappoq nunaqarfinni sanaartugassanut allanullu annerusumik aningaasartalinnut nunaqarfimmi aqutsisut aningaasanik tunineqarneq ajorput, taamaattumillu nunaqarfimmi inuussutissarsiornikkut sanaartornikkullu ineriartortitsinermut nunaqarfimmi aqutsisut toqqaannartumik sunniuteqarsinnaanatillu aaliangiisinnaassuseqanngillat. Nunaqarfimmilu aqutsisut sunniuteqarsinnaanerisa annikipallaarnerisa kingunerisaanik, nunaqarfinni ineriartortitsineq kigaappallaartoq nunaqarfimmi aqutsisut amerlasuut oqariartuutigisaraat, Ingvar Motzfeldt Qeqertarsuatsiaani najugaqartoq oqarpoq.

- Ukiumut aningaasartuutissat pillugit kommunalbestyrelsit missingersuusiornissaat sioqqullugu nunaqarfinnut aningaasaliissutaasartut qaavisigut, sanaartugassat anginerusut aningaasaliiffigineqarnissaat pillugu kommunalbestyrelsinut qinnutigisarpavut.

- Kisianni 2021-minngaanniilli Qeqertarsuatsiaani nunaqarfimmi aqutsisut nunaqarfinnut aningaasaliissutaasartut qaavisigut aningaasanik tunineqarnikuunngillat, taamaattumik nunaqarfimmi aqutsisut tusaaniarneqartarnerat killeqartorujussuuvoq.

- Kisianni nunaqarfinnut aqutsisut ilaat kommunalbestyrelsinut ilaasortaatitaqartarput, tamannalu nunaqarfimmut iluaqutaasarluni, taanna oqarpoq.

Taamaakkaluartoq Qeqertarsuatsiaani nunaqarfimmi aqutsisut Kommuneqarfik Sermersuumi kommunalbestyrelsimi Siumup gruppiani siulittaasumut qinigaaffik kingulleq pitsaasumik attaveqarsimasut, Ingvar Motzfeldt erseqqissaavoq.

Akisussaaffik annertusarniarneqartoq

Ingvar Motzfeldtip oqaasii naapertorlugit Kommuneqarfik Sermersuumi nunaqarfimmi aqutsisut oqartussaaffii annertusarniarneqarnissaat sulissutigineqarpoq.

- Nunaqarfimmi aqutsisut ataatsimeereeraangata kissaatigineqartut kommunimut ingerlatinneqartarput, saaffiginnissutilli kommunimi ingerlatsivinnut unittarlutik.

- Tamannalu anigorneqassappat iliuuseqartoqartariaqarpoq, taamaattumik nunaqarfimmi aqutsisut annerusumik akisussaaffeqalernissaat pillugu suliniut maannakkut qanoq inerneqarumaarnera pissanganarpoq.

- Uanga nammineerlunga qanoq isikkulimmik aaqqiisoqarnissaa pillugu siunnersuutissaqarpunga, tamannali maannakkut oqaatigisinnaanngilara, taanna oqarpoq.

Naalakkersuisunik ataatsimeeqateqartarneq 

KANUNUPE-mi siulersuisut nunaqarfinni soorlu aqqusineqarnikkut, eqqaaveqarnikkut tunitsiveqarnikkullu pissutsit pillugit Naalakkersuisunik ataatsimeeqateqartarput, taamaakkaluartorli tamanna aamma maannakkumut annikitsuinnarmik sunniuteqarsimasoq, Ingvar Motzfeldt oqarpoq.

- KANUNUPE-mit kissaatigineqartut naqitanngorlugit takussutissanik suli maannakkumut takusaqarnikuunngilagut.

- Nunaqarfinni amerlanerpaani eqqaaveqarneq aqqusineqarnerlu suli annertuumik ajornartorsiutaapput, kisiannili maannakkumut annerusumik suli iliuuseqartoqarnikuunngilaq.

- Tassa imaappoq nunaqarfimmi aqutsisut tusaaniarneqarnerisa annikippallaarnerat pissutaalluni nunaqarfippassuarni ineriartortitsineq kigaatsuararsuuvoq, tamannalu soorunami iliuuseqarfigineqartariaqarpoq, taanna oqarpoq.

Nunaqarfinni ineriartorneq kigaappallaaleraangat innuttaasut illoqarfinnut periarfissarissaarnerusunut nuuttarnerat takornartaanngitsoq, tamannalu allanngortinneqanngippat ernumanartoqartoq, taanna isumaqarpoq.