KANUNUPE-mi siulittaasoq toqukkut qimaguppoq

Kalaallit Nunaanni Nunaqarfimmiut Peqatigiiffiat, KANUNUPE siulittaasuminnik annaasaqarput.

Karl Petersen, qinikkatut tunniusimasoq toqukkut qimaguppoq. Taama peqatigiiffiup allattaa, Regine N. Bidstrup, siulersuisut sinnerlugit nalunaaruteqarpoq:

- Nunaqarfimmiunut innuttaasunut qinikkanullu tunniusimalluarluni sullissisoq akornatsinniikkunnaarpoq.

Karl Petersen nunaqarfinni aqutsisuni Innaarsunni, Naajaani Aappilattumilu siulittaasuusimavoq. Kingorna KANUNUPE-mi septembarimi 2022-imi siulittaasunngorpoq.

Nunaqarfinni inuuniarneq pitsaanerusoq ineriartornissarlu ukkatarisimavai.

Tassani qinigaanermini Karl Petersenip nunaqarfinni anartarfeqarneq, eqqagassaqarneq, imeqarneq aqqusineqarnerlu pitsanngorsarusullugit oqaluttuarpoq.

Tunniusimasoq unneqqarittorlu

- Kaalip nunaqarfimmi aqutsisut iluanni innuttaasunut qinikkallu pitsaasumik sullinneqarnissaat pingaartitaraa. Suliassat suungaluarpataluunniit unneqarissumik sullissineq pingaartilluinnarlugu suliap suliarineqarnissaanik qulakkeerinniniartarnini ilisarnaatigaa. 

Regine N. Bidstrupi aamma allappoq Karl Petersen ilisisarisimaleqqaarneraniilli nipi ersarissoq, inuppalaartuunera, inoqatiminut ataqqinnilluni tamanut inissaqartitsilluni sullisserusuttuunera takunikuullugu. Suleqatikkuminartuunera, suliaminut pitsaasumik angusaqarusuttuunera, paasiuminartumik saqqummiussisarnera, minnerunngitsumillu illartarnerata sunniisarnera ilanngullugu allaaseraa:

- Taamaattuungami tamanit ataqqineqarluni suleqatigineqarsinnaavoq. Nuannersuunera, sulerusussuseqarnera nunaqarfimmiunut innuttaasunullu tunniussimasai ataqqillugit qujaniarlutalu eqqaamassassaraagut.

- Kaalip eqqaaneqarnera ataqqinartuuli, Regine N. Bidstrup naggasiivoq.