Kattunnerup kingorna inissiaatileqatigiiffik millionilikkaanik sinneqartooruteqarpoq
Kommuneqarfik Sermersuup inissiaatileqatigiiffia Iserit Nuuk City Developmentimut maanna atorunnaarsinneqarsimasumut kattunnermigut pitsanngoriarpoq.
Kommuneqarfik Sermersooq
Assiliisoq: Leiff Josefsen
Iserit A/S 2023-mi 74,2 millionit koruuninik sinneqartooruteqarpoq. Tamanna 2022-mit pitsaanerungaarpoq, tassani ingerlatseqatigiiffik 9,4 millionit koruuninik amigartooruteqarmat.
Angusat naammagineqarput, Kommuneqarfik Sermersuumilu ingerlatsivik naapertorlugu tamanna NCD A/S-imik kattutsitsinerup kinguneraa.
- Matumani realkreditimit taarsigassarsiat inaarlugit akilerneqarnerinut atatillugu aningaasat nalinginit iluanaarutit 71,5 millionit koruuniusut anguneqarput, ingerlatsivik politikkerinut, ukiumoortumik naatsorsuutinik sapaatip-akunnerani matumani akuersisussanut, allappoq.
Kattussineq ingerlatseqatigiiffiup isertitaqarneranut nalinginnaasumik kivitsinermik kinguneqarpoq, kattussinikkut inissianik 1.000-iusunik piginnittunngorneq tunuliaqutigalugu, ingerlatsivik nangilluni allappoq.
Inissiat 2455-it ingerlakkai
- NCD-mik kattussinikkut realkredit-imit taarsigassarsiat inaarlugit akilerneqarnerinut atatillugu, aningaasat nalinganit iluanaaruteqartinnagu, 2023-mi naatsorsuutit inerneri 2,7 millionit koruunit missaanniusimassagaluarput, 0,4 millionit koruuninik sinneqartoorutissat missingersorneqarlutik, tamannalu naammaginarpoq, ingerlatseqatigiiffik allappoq.
2023-mi Iserit inissianik 2455-inik ingerlatsivoq, taakkunannga Nuummi 1882-it, Paamiuni 107-it, Tasiilami 403-t Ittoqqortoormiinilu 63-it.
Kommunip illoqarfimmik ineriartortitsinermut ingerlatseqatigiiffiutaa Nuuk City Development aningaasatigut ajornartorsiortoq 2022-mi paasineqarpoq. Sanaartornissamut suliniutit arlallit aningaasalersorneqarsimanngillat, Naalakkersuisunillu akuersissutigineqarsimanatik.
Taamaattumik ingerlatseqatigiiffik taanna ingerlatseqatigiiffimmut Iserimmut kattunneqarpoq.
Sanaartornerit kommunimut tunniunneqartut
Nuuk City Developmentip meeqqeriviit arlallit atuarfissuarlu Nuup qeqqani sanaartorpai. Sanaartornerit 2023-mi januaarip 13-iani Kommuneqarfik Sermersuumut 646 millionit koruuninik akeqarlutik tunniunneqarsimasut, Iserit ilisimatitsivoq. Sanaartornerup malitsigisaanik Nuuk City Developmentip akiitsoqalerneranut akiliinermut aningaasat atorneqarput.
Ingerlatseqatigiiffik 2023-p naanerani aningaasat tigoriaannaatai 33,8 millionit koruuniupput, nammineerlunilu 1,113 millionit koruuninik aningaasaateqarluni.
- Taamaalilluni ingerlatseqatigiiffik NDC-mik kattunneqarnermigut aningaasatigut pitsanngorfiuvoq, Kommuneqarfik Sermersooq naliliivoq.
