Kina Folketingimi paarlattaassava?
Inatsisartut ukiaanerani ataatsimiinnerat sapaatip-akunneri marluk qaangiuppata aallartippat, Aki-Matilda Høegh-Damip Folketingimi issiavianut kina ingissanersoq suli paasinngilarput. Markus E. Olsen eqqartuunneqarnermat alla sinniisunngortussanngorpoq.
Erik Jensen Siumumi siulittaasuunerani folketingimut 2022-mi qinigassanngortut.
Assi: Leiff Josefsen
Naleqqamit folketingimut ilaasortaq Aki-Matilda Høegh-Dam Inatsisartunut 2025-mi marsip aqqarngani qinersinermi 3.000-ingajannik taaneqarluni qinigaalluarpoq. Taamanimiilli Kalaallit Nunaanni Inatsisartuni sulineq aallartippaa, Folketingimi inissisimaffia qanoq pineqassanersoq erseqqissumik oqaatigineqarsinnaasimanngilaq.
Aki-Matilda Høegh-Dam Inatsisartut ukiakkut ataatsimiinneranni peqataanermini, Folketingimi septembarip 19-ianiit novembarip 14-iata tungaanut sulinngiffeqarnialerpasimmat sapaatip-akunnerani matumani apeqqut taanna suli pingaaruteqarnerulerpoq.
Aki-Matilda Høegh-Dam Siumut sinnerlugu Folketingimut qinigaavoq. Taamaattumik 2022-mi qinersinermi Siumup qinigassanngortitai pingasut allat, Markus E. Olsen, Karina Zeeb aamma Elvira Kûitse, Folketingimut sinniisutut suliartornissaanut aggersarneqarsinnaapput.
Paarlattaanikoq eqqartuunneqartoq
Sinniisutut siullertut inissisimasoq Markus E. Olsen Høegh-Damip 2023-mi sivikitsumik nunami allamiinnerani Folketingimi paarlattaareernikuuvoq. Taanna kannguttaatsuliorsimasutut Nunatta Eqqartuussisuuneqarfiani sisamanngormat ualikkut pisuutinneqarpoq.
Markus E. Olsen Folketingimi sulisinnaanani tallimanngornermi nalunaarpoq:
- Eqqartuussiviup aalajangiinera ataqqivara, naak suliaq suli ilungersunartutut misigissutsikkut artornartutullu isigigaluarlugu, Altingetimut allappoq.
Sinniisutut tullertut inissisimasup Karina Zeebip, Kalaallit Nunaanni Politiini maana sulisoq, paarlattaasinnaanissaa periarfissaalerpoq.
Paarlattaanissaminut periarfissinneqassaguni piareersimanersoq, Markus E. Olsenip eqqartuunneqarnissaa sioqqutitsiarlugu Sermitsiamit aperaarput.
Karina Zeebilli suliffini pissutigalugu politikkimut tunngasut akiumanngilai.
Elvira Kûitse sinniisut pingajuattut inissisimavoq. Folketingimi sinniisutut piareersimanerluni taassuma aamma akisinnaanngilaa. Piffissanngorpat akiumaarlugu oqarpoq. Elvira Kûitsep Siumumi suli ilaasortaanini uppernarsarpaa.
