Kisermaassineq kipineqassaaq: Aalborgimiit Nuummut timmisartuussineq nutaaq
Maanna Atlantikoq qulaallugu timmisartuussinermi unammillertoqalerpoq.
Aappaagu Air Greenlandip Atlantikoq qulaallugu timmisartuussinermi kisermaassisuunera kipineqassaaq, juunip aqqaneq-aappaanni 2025-mi Aalborgip Nuullu akornanni toqqaannartumik timmisartuussineq nutaaq aallartippat.
Tamanna pingasunngornermi ualikkut Aalborgip mittarfiani tusagassiortunik katersortitsinermi saqqummiunneqarpoq. ’Ruby Rejser’ Aarhusimeersoq timmisartuussinermik ingerlatsisuuvoq, taannalu septembarip aallaqqaataat 2025-p tungaanut sapaatip-akunneranut marloriarluni timmisartuussisassaaq.
Bilitsit akikitsut
Siumuinnaq bilitsinut akigititat 1.998 koruuninit aallartissapput, timmisartuutileqatigiiffilli allanngorartunik akigititaqarniartoq Ruby Rejsersip Aalborgimi allaffiani pisortap Morten Meyerip erseqqissarpaa, taamaattumik piffissani angalaffiusunilu piumaneqarluartuni akit qaffasinnerusinnaapput.
Aammattaaq Aalborgimiit Nuummut nalunaaquttap-akunneri sisamat missaanni timmisartuussinermi sassaalliutinut akiliuteqartoqartassaaq.
Ataasinngornerit sisamanngornerillu tamaasa timmisartuussisoqartassaaq. Aalborgimiit nal. 6.00 aallarluni Nuummut nal. 7.50 tikittoqartassaaq, Nuummiillu nal. 8.50 uterluni nal. 16.20 Alborgimut tikittoqartassalluni.
Timmisartortitseqatigiiffik Airseven timmisartumik Boeing 737-800-mik 189-inik ilaasoqarsinnaasumik timmisartuussisassaaq.
Klippekorti
Timmisartorluni angalaneq takornarianut pingaarnertut saaffiginnissutaavoq, kikkulli tamarmik inniminniisinnaapput – aamma sulinerminnut atatillugu angalasut naatsorsuutigaavut, taakkualu Nuummi ullualunni angallannikkut ajornanngitsumik akikitsumillu suliartorlutik angalasinnaapput.
Nassiussanik assartuinermi Ruby Rejser-ip Blue Water-i suleqatigissavaa.
- Nassiussat minnerpaamik 3 tonsit inissaqartinneqartassapput, immaqalu timmisartoq ulikkaanngikkaangat amerlanerusinnaallutik, Aalborgip mittarfiani pisortap tullia ingerlatsinermullu pisortaq Kim Bermann oqarpoq.
