Ukiualuit matuma siornatigut aningaasanik nuussisarnerit inatsisilerituunit Elmannimit misissorneqarput. KNAPK-p siulersuisui misissuititsisuupput.
- Allakanik assiliinerit, aningaasatigut nuussinerit pasinartut aningaasanillu pissalinnut akiliisimannginnerit pineqarput, KNAPK-p siulittaasua Nikkulaat Jeremiassen Sermitsiaq.AG-mut nassuiaavoq, nangillunilu:
Ukiualuit matuma siornatigut aningaasanik nuussisarnerit inatsisilerituunit Elmannimit misissorneqarput. KNAPK-p siulersuisui misissuititsisuupput.
- Allakanik assiliinerit, aningaasatigut nuussinerit pasinartut aningaasanillu pissalinnut akiliisimannginnerit pineqarput, KNAPK-p siulittaasua Nikkulaat Jeremiassen Sermitsiaq.AG-mut nassuiaavoq, nangillunilu:
Kapisilinnik aningaasaateqarfimmi pasinartut
- Aammattaaq pisut arlallit pasinartut kapisilinnik aningaasaateqarfimmut tunngassuteqarput, tassani ukiut pingasut matuma siorna 1.050.000,00 koruunit eqqumiitsumik tammarsimapput. Aningaasaateqarfimmit tassanngaanniit KNAPK-p Atlantic Salmon Foundationimut aamma North Atlantic Salmon Foundationimut ukiumoortumik akiligassani akilersimanngilai. Kattuffiup taakku 2018-imi ukiuni aqqaneq-marlunni atuuttussamik isumaqatigiissuteqarfiginikuuai. Suleqatigiinnissamik isumaqatigiissutaanikuugaluartutut akiligassat akilerneqarsimanngillat.
KNAPK ukiumut 400.000 koruuninik isertitaqarnissaraluani taamaalillunilu annaasaqaatigigaa siulittaasoq isumaqarpoq, aningaasallu annaasaqaataasut aalisarnermik allatut periarfissanik siuarsaanissamut atorneqartussatut kattuffiup ilaasortaanut agguaanneqarsimasinnaagaluarput. Aningaasat taakku kattuffiup maanna amigaatigai aningaasatigummi ilungersunartumik inissisimaleramik. Akiliisinnaassuseqarneq unammillerneqarpoq ukiumullu naatsorsuinermi tullermi amigartoortoqassalluni. Tamanna Sermitsiaq.AG-p sisamanngornermi saqqummiuppaa.
Nikkulaat Jeremiassen eqqartuussissuserisut misissuinerat pillugu KNAPK-p immikkoortortaqarfiinut ilisimatitsissummik allagaqarpoq. Sermitsiaq.AG-p unammilligassat isertuunneqartut apeqqutilliiffigereeraalu tamanna pivoq.
Inerniliisoqanngitsoq
- KNAPK inerniliinngilaq, pisullu qulaajarneqarnissaat kissaatigalugu taamaalillunikattuffimmi immikkoortortat pineqartut aalajangiisinnaaniassammata pisariaqarpallu akisussaaffik kimut tunniunneqassanersoq aalajangerlugu. Taamaattumik politiinut nalunaarutiginninnissamut tunngavissaqarnersoq oqaatigissallugu siusippallaarpoq, kattuffiulli pissutsit ilungersunartutut isigai, taamaattumillu qallunaat eqqartuussissuserisoqarfiat suliamut akuliunneqarpoq, Nikkulaat Jeremiassen ilisimatitsivoq.
Eqqartuussissuserisut suliaminnik naammassinnissinnaaqqullugit eqqissisimatinneqarnissaat kissaatigineqartoq immikkoortortaqarfinnut nalunaarummi siulittaasoq allappoq. Taamaaliornikkut "pisut paasiniaaffigineri illersorneqarsinnaasumik suliarineqarniassammata".
- Ileqquusumik ataatsimeersuarnermi pisunut aalajangiinerit pisussaassapput. Taamaattumik inernileereernata arlaannullu piumasaqaataasinnaanersoq aalajangertinnata misissuineq una utaqqeqqaarallartigu , Nikkulaat Jeremiassen oqarpoq, taamaalillunilu immikkoortortaqarfiit arlallit immikkut ittumik ataatsimeersuarnissamik kissaateqarnerat itigartillugu.
Kapisilinnik aningaasaateqarfimmi kisimi pasinartumik pisoqarsimanngitsoq siulersuisut isumaqarput.
Atortunik tuniniaavik misissorneqarpoq
Eqqartuussissuserisut KNAPK-p atortussanik pisiniarfiani pisimasunik aamma paasiniaasut KNAPK-mi aqutsisui ilisimatitsipput
- Aalisartunut amerlasuunut aningaasarpassuit isumakkeerfigineqarput, taakkuli akilerneqarsimanngillat, ukiumulli naatsorsuutinut 2020-mut, 2021-mut 2022-mullu ilanngaatigineqaannarsimallutik. Aamma pisiniarfiup toqqorsivianiittut nalilersorneqarnerannut amigaateqarput, taakkua kukkunersiuisut ukiuni arlalinni isornartorsiortarsimavaat, paasissutissiissutigineqartumi allassimavoq.
Aningaasanik atuineq pinerlunnerunersoq siulersuisuunerit nalilerneqassasoq kissaatigaat, "siornatigullu sinniisuusimasunut“ taarsigassiissutigineqarsinnaanersut.
KNAPK-p siulittaasua Nikulaat Jeremiassen ima naggasiivoq:
- KNAPK-p aningaasaqarnikkut pissutsit qulaajarnissaat toqqissisimanartillugillu eqqissisimanartippaat, taamaattumik inerniliinnginnitsinni piumasaqaateqannginnitsinnilu eqqartuussissuserisumit misissuinerup inernera utaqqissavarput.
