KNAPK-mi immikkut ittumik ataatsimersuartoqarnissaanut I.A.P.P piumasaqarpoq
Pissutsit kingulliit pisut pissutigalugit I.A.P.P immikkut ittumik KNAPK-mi ataatsimeersuartoqarnissaa piumasaraa. I.A.P.P isumaqarpoq aalisarnermut inatsisissamut tusarniaanermi tusaaneqarsimanatik.
Pele Blytmann, I.A.A.P-imi siulittaasoq KNAPK-mi immikkut ittumik ataatsimeersuartoqarnissaanik piumasaqarpoq. Taassuma aalisarnermi inatsisissamut tunngatillugu tusarniaasoqarmat inatsisilerituumit nassuiaanneqarnissamik kissaateqarsimagaluarpoq, tusarniummut akissut Naalakkersuisunut nassiutinnginnerani.
Blytmann naapertorlugu tusaaniarneqarsimanngillat.
- Aalisarnermut Piniarnermullu Naalakkersuisoq tikimmat aatsaat tikeqatigaa, Pele Blytmann oqarpoq.
Siulittaasoq Sermitsiamut nassuiaavoq aalisarnermut inatsisissamut tusarniut kisimi pineqanngitsoq. Ilaatigut aamma Royal Greenlandimut akinik KNAPK isumaqatiginninniarnernut sanngiippallaarnerarpaa. KNAPK-lu Namminersorlutik Oqartussanik oqaloqateqarsinnaannginnerarlugu.
Sermitsiaq KNAPK I.A.P.P-ip piumasaanut oqaaseqartinniarlugu attavigaa. Pisortap Vittus Qujaukitsup oqaatigaa siulersuisut inissititserinermi ataatsimeereerunik aatsaat tusagassiuutinut oqaaseqarsinnaasut.
