KNI 250-liivoq
KNI ukiuni 250-nngortorsiorluni nalliuttorsiutigineqarpoq, taamaattumik nuna tamakkerlugu Pilersuisup illoqarfinni nunaqarfiinnilu pisiniarfiini kaffillertoqarpoq. Atuagaq innuttaasunut tamanut agguaanneqassaaq kiisalu kulturikkut illorsuami Sisimiuniittumi Taseralimmi assinik saqqummersitsisoqarluni.
KNI
KNI ullorsiorpoq.
KNI sisamanngornermi maajip 16-ani ukiunik 250-inngortorsiorpoq. Nunatsinni tamarmi nalliuttorsiutigineqarpoq.
Kaffillerneq
Illoqarfinni nunaqarfinnilu Pilersuisup pisiniarfeqarfiini aamma pisiniarfeqarfiunngitsuni Polaroilip tankeqarfiini piumasunut sisamanngornermi kaffillerpoq meeqqanullu assigiinngitsunik unammisitsisoqassalluni.
- Nalliuttorsiornermi nerersuuaartitsinermut taarsiullugu pisisartunut sulisunullu immikkut tunniussaqassaagut, KNI-mi pisortaaneq Jeppe Jensen tusagassiuutitigut nalunaarummi oqarpoq.
- Tunniussassarput tassaavoq atuagaq Kalaallit Nunaat ataatsimoorfigalugu assinik pisoqqanik nutaanillu imalik kiisalu pisisartutta ulluinnarni inuunerinik peqataaffigisatsinnik ilisarititsinerusoq. Atuakkap suliarinerani nuannaarutiginninnitsituulli atuartussat aamma nuannaarutigiumaaraat neriuutigaarput.
Atuagaq Pilersuisoqarfinni illunut agguaanneqassaaq, inoqutigiit atuakkamik ataatsimik tunineqassallutik. Atuakkamiippoq QR kode nalliuttorsiornermi unammisitsinitsinnut peqataaniaraanni iserfissaq.
Assinik saqqummersitsineq
Sisimiuni, KNI-p kiffartuussiviata sumiiffigisaani, suliffeqarfik innuttaasut sammisaqartitsissaaq arfininngornermi maajip ulluisa 18-anni Taseraliup eqqaani iluanilu, tassani assit atuakkamit tigulaakkat ilai alakkarneqarsinnaasut, ilanngullugu paasissutissiissutigaat.
