KNI aningaasaqarnermut pisortartaartoq

Peter Wistoft KNI A/S-ip 2025-mi marsip aallaqqaataani aningaasaqarnermut pisortatut atorfinitsippaa.

Peter Wistoft Grønlandsbankenimi siulersuisunut ilaasortaavoq, ukiorpassuarnilu Kalaallit Nunaanni kukkunersiuisutut akuerisatut misilittagaqarpoq.

- Peter Wistoftip atorfininneratigut piginnaasaqarluartumik, periusissiullaqqissumillu aningaasaqarnikkut pisortartaassaagut. Piitap piginnaasaqarfigilluagai, suleqatigiinnermik siunertaqarluni aqutsineq kiisalu nunatsinni pissutsinut ilisimasaqarluarnerata piffissami allanngorarfiusumi aningaasaqarnermut pisortanngornissaata toqqarneranut peqqutaalluinnarput, KNI A/S-imi pisortaaneq Jeppe Jensen tusagassiuutinut nalunaarummi allappoq.

Periusissianut pilersaarusiornermi missingersuusiornermillu piginnaasaqarluartoq

KNI Kalaallit Nunaanni pissutsinut ilisimasaqarluartumik, kiisalu Namminersorlutik Oqartussat, suliffeqarfiutaasalu akornanni pissutsinut ilisimasaqarluartumik taamaalilluni aningaasaqarnermut pisortartaarpoq.

Taamatuttaaq Peter Wistoft missingissersuusiornermut, malittarisassanut eqquutsitsinermut, digitalinngortitsinermut, periusissianullu pilersaarusiornermut piginnaasaqarluartoq KNI A/S allappoq.

Peter KNI-p suliffeqarfittut ingerlatsinerani, tunngaviusunik atugassarititanik aningaasaqarnikkullu annertuumik sunniuteqartussanik allanngoriartortoqarnerani aaqqiissutissanik suliaqarnissatsinni peqataassaaq. Tamatuma saniatigut KNI-mi annertuunik periusissiarput aallaavigalugu suliniuteqarpugut, suliniutillu taakkua digitaliunerusumik ingerlatsinissatsinnik qulakkeerinnittuussapput, suliffeqarfik nalunaarpoq.

Aningaasaqarnermut pisortanngortussap unammilligassat qilanaarai:

- Unammilligassaq pissanganarluinnarpoq, Kalaallit Nunaanni inuiaqatigiinni allanngoriartortoqarpoq, tamakkualu KNI arlaatigut sunnertussaavaat. Suliassat ilagissavaat allannguutinut tamakkununnga KNI-p pimoorullugu tulluarsartuarnissaa, sullitatsinnut piginnittutsinnullu iluaqutaasussamik. Suliassap taassuma uanga nammineerlunga, KNI-milu suleqatissakka peqatigalugit aallunnissaa erinigilluinnarpara, Peter Wistoft oqarpoq.