KNI-mi naatsorsuuserisuusimasoq Nunatta Eqqartuussiviani sassartinneqalersoq
Naatsorsuuserisuusimasoq ukiuni pingasuni pineqaatissinneqarsimasunut inissiisarfimmiittussanngorlugu eqqartuunneqartoq, maanna Nunatta Eqqartuussisuuneqarfiani sassartinneqartussanngorpoq. Tamanna februaarip ulluisa 17-anniit 19-annut pissaaq.
Assi: Leiff Josefsen
Nunatta Eqqartuussisuuneqarfiani februaarip 17-aniit 19-anut Kalaallit Nunaanni ukiuni kingullerni aningaasatigut pinerlunnerit annerpaartaasa ilaat aalajangiiffigineqassaaq.
KNI A/S-imi naatsorsuuserisuusimasoq ukiuni pingasuni pineqaatissinneqarsimasunut inissiisarfimmiittussanngorlugu eqqartuunneqarpoq, sulili pinngitsuunerarpoq.
Eqqartuussivilersuussineq siorna Qeqqata Eqqartuussiveqarfiani maajimi aallartippoq. Unnerluutigineqartoq tassani pinngitsuunerarpoq. Tassani pisunut katillugit 29-nut unnerluutigineqarpoq, aningaasat pissarsiassarinngisani katillugit 3,3 millionit koruunit pissarsiarisimallugit.
Illersuisup unnerluussisussaatitaasullu suliaq Nunatta Eqqartuussisuuneqarfianut suliareqqitassanngortippaat. Illersuisoq pinngitsuutitsinissamik piumasaqarpoq, unnerluussisussaatitaasut sakkortunerusumik pineqaatissiisoqarnissaa kissaatigigaat.
Nunatta Eqqartuussiviata maanna eqqartuussut atuuttussanngortissaneraa, sakkortusissaneraa pinngitsuutissaneraalu aalajangiiffigisussanngorpaa.
