KNI-p naatsorsuuserisuusimasup pineqaatissinneqarsimanera ilisimanngilaa

Eqqartuussinermi paasinarsivoq KNI-imi naatsorsuuserisuusimasoq siornatigut allami atorfimmi pisortaanermini aningaasanik millionilikkaanik arlalinnik peqquserluttuliorsimasutut Tåstrupip eqqartuussiviani 2006-imi eqqartuunneqarsimasoq.

- Naatsorsuuserisuusimasoq KNI-mi 2011-imi atorfinitsinneqarpoq. Atiminik allanngortitsinikuusimanersoq 2006-imilu pineqaatissinneqarsimanersoq ilisimasimanngilarput. Tassunga tunngatillugu siornatigut aqutsisuusimasut aperineqarsinnaapput, KNI Sermitsiamit aperineqarami akivoq.

- Maanna aningaasaqarnermut pisortaanerusoq KNI-mi 2014-imi atorfinitsinneqarpoq. Eqqartuussineq 2023-mi naammassineqartinnagu eqqartuunneqarsimanera atimiluunniit allanngortissimaneranik paasissutissaateqanngilaq.

Periuseq sukanganerulersoq

KNI-mi naatsorsuuserisuusimasoq ukiuni arlalinni KNI-mi naatsorsuuserisuunermi nalaani atsiornernik ajornanngitsuaqqamik eqqunngitsuliorsinnaallunilu fakturanik akuerineqareernikunik allanngortiterisinnaanikuusimavoq.

Peqquserluttoqarsimasinnaaneranik allakkanillu eqqunngitsuliortoqarsimasinnaanerani KNI 2021-imi pasitsaassaqalermat naatsorsuuserisuusimasoq ingerlaannartumik soraarsinneqarpoq. KNI Sermitsiamut paasissutissiivoq periaaseq sakkortusaavigineqarsimasoq:

- Pisup kingunerisaanik KNI 2021-imi naatsorsuuserisutut suliffeqarfik PwC suleqatigalugu suleriaasinik nakkutiginneriaatsinillu misissuivoq. Taassuma kingorna nakkutiginninnermi allanngortitserisoqarpoq pitsanngorsaasoqarlunilu, taamaaliornikkut assinganik pisoqaqqinnissaa annikillisarneqarluni.

- Allannguutit pitsanngorsaanerillu tamakku aamma ERP-systemimut nutaamut ineriartortinneqartumut ilanngunneqassapput, tassanilu ullumikkut assammik suliarineqartartut amerlasuut automatiskinngortinneqassapput.

Sulisut pinerlussimassanngillat

Suliffeqarfiup pinerlussimasunik sulisussarsiunnginnerani sulisut pinerlussimannginnerminnik uppernarsaatinik takutitseqqaartassapput.

- 2021-mi aamma aalajangerneqarpoq sulisut tatigisassaasut pinerluttutut eqqartuunneqarsimannginnerminnik uppernarsaatinik takutitsissasut, inuit aningaasatigut peqquserluttuliorsimasutut eqqartuunneqarsimasut KNI-mi sulilersinnaaqqunagit suliinnarsinnaaqqunagillu.

KNI-mi naatsorsuuserisuusimasoq maajip 16-ani ukiuni pingasuni pineqaatissinneqarsimasut inissiisarfianiittussanngorlugu eqqartuunneqarpoq. Illersuisuata pinngitsuutinnissaa anguniarlugu suliaq ingerlateqqippaa. Unnerluussisussaatitaasullu sakkortusaaviginiarlugu aamma ingerlateqqillugu.