KNQK, Kalaallit Nunaanni qimussertartut Kattuffiat, Facebookikkut nassuiaanerminni naatsorsuutinik Naalakkersunut maanna tunniussisimanerarput.
Kultureqarnermulli Naalakkersuisup Sermitsiamut paasissutissiinera malillugu kattuffik suli 2020-mut, 2023-mut 2024-mullu ukiumoortumik naatsorsuutinik tunniussaqanngilaq taamaattoq 2021-mut 2022-mullu ukiumoortumik naatsorsuutit ukioq manna apriilip aallartinnerani tunniunneqarput.
KNQK, Kalaallit Nunaanni qimussertartut Kattuffiat, Facebookikkut nassuiaanerminni naatsorsuutinik Naalakkersunut maanna tunniussisimanerarput.
Kultureqarnermulli Naalakkersuisup Sermitsiamut paasissutissiinera malillugu kattuffik suli 2020-mut, 2023-mut 2024-mullu ukiumoortumik naatsorsuutinik tunniussaqanngilaq taamaattoq 2021-mut 2022-mullu ukiumoortumik naatsorsuutit ukioq manna apriilip aallartinnerani tunniunneqarput.
Kinguaattoornerit kukkunersiuisumik akuerisamik nassaarniarnermik ajornakusooruteqarnermik patsiseqartut, kattuffik allagarsiussamini nassuiaavoq:
– Naatsorsuutit kinguaattoorutaanerat inuit tupigusuutigigaat maluginiarparput. Kinguaattooqqanerput ilumoorpoq. Piffissami sivisuumi kukkunersiuisumik akuerisamik nassaarsinnaasimannginnerput patsisaavoq. Taamaammallu ataatsimeersuarnissaq kinguartipparput. Maannali qujanartumik kinguaattooqqajunnaarpugut, siulersuisut Facebookimi allapput.
Suli ilaasortat naammaginninngillat
Nassuiaalli amigarpoq, kattuffillu suli annertuumik isornartorsiorneqarpoq. Ilulissani Qimussersaq 71-mi siulittaasoq Emil Mathiassen isorinnippoq:
– Naammagisimaarinninngilluinnarpugut. Angallassinermut aningaasartuutivut allat aningaasartuutaasa assigineraat nalugatsigu, naatsorsuutit takorusuppagut. Avannaata Qimussersuanut peqataasussat ilaat annikinnerusumik akiliisartut tusarparput, taamaammallu uppernarsaatissanik takorusuppugut, taanna Sermitsiamut oqarpoq.
Taassumattaaq siulersuisut tatiginassusaat apeqquserpaa:
– Tatigisinnaanngilagut. Naatsorsuutit amigaateqangaarmata KNQK-miluunniit siulersuisunut sassarnissaq pilerinarunnaarpoq. Aningaasaqarnerup qanoq inneranik paasisaqarsinnaannginneq toqqissisimananngilaq.
Nunatsinni piffinni peqatigiiffiit Avannaata Qimussersuani qimminik, qamutinik peqataasunillu assartuineq KNQK-p akileeqataaffigisarpaa – taamaammallu naatsorsuutit imarisaasa takunissaat ilaasortanut pingaaruteqarpoq.
Tusagasiorfiup Sermitsiap arlaleriarluni naatsorsuutit taakkartorneqartut takujumasarpai, siulittaasorlu Mikkel Jeremiassen oqaaseqartinniartarlugu, taassumali sianeraangatta oqarasuaat tiguneq ajorpaa, SMS-kkut, messengerikkut emailikkullu saaffiginnissutigut akisanngilai.
Sermitsialli KNQK-p tusagassiortunut akisussaasua attavigigaluaramiuk aamma iluatsinngilaa.
Sisimiuni ataatsimeersuarneq matoqqasoq – tusagassiorfiit anisinneqarput
KNQK Sisimiuni ukioq manna marsip 24-iani ataatsimeersuarmat, ataatsimeersuarneq matoqqasumik ingerlanneqarpoq. Ataatsimiinnissap aallartinnissaa sioqqutitsiarlugu, siulittaasup Mikkel Jeremiassenip ataatsimeersuarnerup matoqqasumik ingerlanneqarnissaa siunnersuutigaa, tassanilu “avataanit annertuumik soqutigineqarneq” tunngavilersuutigaa.
Tamanna sioqqullugu Avataata Qimussersua Amerikamiunit taperneqarsimasoq saqqummiunneqarpoq. Isornartorsiuinerup kingunerisaanik amerikamiut vicepræsidentiata J.D. Vance nulianilu qimussersuartoqarneranik Sisimiunut isiginnaariarnissartik taamaatiinnarpaat.
Ataatsimeersuartut matoqqasumik ataatsimeersuarnissaq akueraat, tamatumalu Sermitsiami tusagassiortup inimit aninissaa, taamaalillunilu naatsorsuutinik amerikamillu tunissutisianik oqallinneq malinnaaffigisinnaajunnaarpaa.
Sermitsiap KNQK-p siulittaasuanik itisiliisitsiniaraluarpoq, tamannali iluatsinngilaq.
