KNR-imi siulersuisut: - Ernumassutigineqartut pimoorulluinnarpavut
KNR-imi siulersuisuni siulittaasuugallartup Tusagassiuinermi Sulisut Peqatigiiffiata ernumassuteqarluni allagai qisuariarfigai. Atorfiit inuttassarsiuunneqartut 19-it maannakkut KNR-ip nittartagaani takuneqarsinnaasut ernumassutigalugit peqatigiiffik KNR-ip siulersuisuinut allappoq. Ernumassutigineqartut siulittaasuugallartup pimoorullugit tigullugit ilisimatitsissutigaa.
Miki Jensen KNR-imi siulersuisuni siulittaasuugallarpoq.
Lars Kleemann Andersen
KNR-imi siulersuisut Sermitsiamut uppernarsarpaat ilumut Tusagassiuinermi Sulisut Peqatigiiffimmiit KNR-imut tunngatillugu ernumassummik allagarsisimallutik. Ernumassutit pimoorulluinnarlugit tigusimallugit paasissutissiivoq.
- Saaffiginnissutigineqartut tusagassiuutitigut eqqartorusunngilavut, qularutiginagulu ilisimatitsissutigisinnaavara siulersuisut pissutsit ilisimallugillu iliuuseqarfiginiarlugit suliniuteqartut, Miki Jensen KNR-imi siulersuisuni siulittaasuugallartoq allappoq nangillunilu:
- KNR-imi ajornartorsiutaasut aaqqiiviginiarlugit iliuuseqapallattoqarsinnaanngitsoq siulersuisut ilisimavaat. Tamanilli malunnarpoq sulisut, aqutsisut siulersuisullu akornanni tatineqarneq annertusoq. Taamaattoqartillugulu eqqissisimanissaq, aalajangiipallannginnissaq ajunngitsumillu kinguneqartitsiumalluni ataatsimoornissaq pingaaruteqarput.
Suliaq aallartippoq
Miki Jensen aamma ilisimatitsivoq KNR-imi pisortat atorfiit inuttalerneqanngitsut pillugit suliamik aallartitsisimasut, immikkoortortaqarfinnilu tamani sulisut naammagisimaarinninnerannik 2023-mi ukiakkut misissuinerup inerneri tunngavigalugit sulinermi avatangiisit sulinermilu atugassarititaasut pitsanngorsarniarneqartut.
- Suliniut sivisusinnaavoq, kisianni siumut aallarneruvoq. Suliniullu taanna KNR-imi aqutsisuniit ingerlaavartumik nalilersorneqartassaaq. Sulisut aqutsisut siulersuisullu ukiup ukiallu ingerlanerani suliffeqarfimmi periusissiaq ukiuni sisamani atuuttussaq suliarivaat.
- Periusissiap KNR-ip suliffeqarfittut orniginartuunissaa qulakkeeqataaffigissavaa. Sulisut sulinermi avatangiisaat sulisullu tamarmik ingerlalluarnissaat sulilluarnissaallu periusussiami anguniarneqarpoq, tassani killormut ineriartortoqannginnissaanut ikiuutaasumik, Miki Jensen, KNR-imi siulersuisuni siulittaasuugallartoq, oqarpoq.
Miki Jensenip ilanngullugu paasissutissiissutigaa sulinermi atugassarititaasut atugarissaarnerlu pitsanngorsarniarlugit misissuinerit pisimasut. Ajornartorsiutaasullu aaqqiiviginiarlugit iliuusissamik pilersaarusiortoqartoq, taannalu periusissiami saqqummertussami pingaaruteqartoq.
- Siulersuisut ulluinnarni ingerlatsinermut aqutsinermullu akuliutinngillat, siulersuisulli allat assigalugit suliniutit ineriartornerillu ingerlatseqatigiiffimmut ataatsimut tunngasut pillugit malinnaatinneqartuarpugut, Miki Jensen naggasiivoq.
