KNR-ip Avannaata Qimussersua TV-kkut toqqaannartumik aallakaatissanngilaa

Avannaata Qimussersua pippat KNR-TV-kkut toqqaannartumik isiginnaarsinnaanavianngilat.

TV-kkummi toqqaannartumik aallakaatinniarnagu KNR aalajangerpoq.

Inatsisartunut kommunimullu qinersinerup nalaaniimmat aallakaatinneqassanngitsoq aalajangiinermut pissutaavoq.

KNR-imi sulisut atorneqarsinnaasut ikippallaarmata qinersinissamut aallakaatitsinerit pingaarnersiorneqarput:

- Pingaarnersiuisariaqarpugut. Tamaasa ataatsikkut aallakaatinnissaanut inuttakippallaarpugut. Atortut angallattussaavaat, piffissamilu tassani Avannaata Qimussersua toqqaannartumik aallakaatinnissaa ajornarpoq, taamaattumik qinersinissaq pingaarnersiuinermik toqqartariaqarsimavarput, Mathias Davidsen Sermitsiamut oqarpoq.

Periarfissarsiortut

Susanne Berthelsen, Qimusseq Sisimiuni siulittaasuuvoq, Avannaata Qimussersualu Sisimiuni pisussaq suliaralugu. KNR-i toqqaannartumik aallakaatitsinianngitsoq, taassuma tusarsimavaa:

- Iliuusissaqanngilagut, Sisimiut TV aamma periarfissanik misissuigaluarpoq, kisianni qinersinerup nalaaniikkami. Kisianni periarfissanik misissuivugut, oqaatigisinnaanngilara sunaanersoq, suliaq suli ingerlammat. Ullutsinni suna tamarmi ajornanngilaq, Susanne Berthelsen Sermitsiamut oqarpoq.