KNR: Ukiup ataatsip iluani soraarniutit 35-t
Tusagassiorfimmi innuttaasunik kiffartuussiffiusumi sulisut qaammatini aqqanilinni kingullerni amerlasuut atorfimminnit soraarsimapput. - Tamanna nalinginnaanngilaq, KNR-imi pisortaq nassuerpoq.
KNR-imi tusagassiortut 36-usussaapput. Kalaallit tusagassiortut maanna 18-iupput qallunaallu tusagassiortut arfineq-marluusut taakkunannga pingasut paarlattaasuupput. Tassa KNR tamaat isigalugu atorfiit aqqanillit inuttaqanngillat.
Leiff Josefsen
Nunatsinni
inuiaqatigiinnik kiffartuussiviup KNR-ip ajornartorsiornera
nutaarsiassaanngilaq.
Tusagassiorfiup
sulisussaaleqinini pissutigalugu ukiup aallartinnerani - aammaarluni
- internetikkut nutaarsiassanik ikinnerusunik saqqummersitsisalerpoq,
unnukkut radioaviiseqartitsisarneq atorunnaarsillugu Qanoruullu
aallakaatinneqartarnera sivikillisippaa.
KNR-imi sulisut 35-t
qaammatini aqqanilinni kingullerni soraarsimasut Sermitsiap
allagaatinik takunnissinnaatitaaneq atorlugu pissarsiaani
atuarneqarsinnaavoq. Taakkunannga 15-it tusagassiortuupput,
arfinillit pisortaallutik aaqqissuisuullutilluunniit.
KNR-ip pisortaata Annga
Lyngep Sermitsiamut nassuiaatigaa soraartorpassuarnut pissutaasut
tassaasut aningaasarsiat, soraarnerussutisiat, sulisunut inissiat
amigaataanerat, suliffeqarfimmi nikisiterinerit taartaasullu
unerarnerat.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
KNR-ip sulisut atugaannik
misissuinera atuaraanni akissarsiat atorfeqarnermilu
atugassarititaasut unammilligassat ilagiinnaraat atuarneqarsinnaavoq.
2018 kisiat minillugu 2017-imili aqutsineq sulinermilu
atugassarititaasut naammagineqanngitsutut oqaatigineqarput,
akissarsiat atorfeqarnermilu atugassarititaasut saniatigut. KNR-ip
siusinnerusukkut allaaserisami nammineerluni taamaattoqarnera
saqqummiunnikuuaa.
Atorfiit aqqanillit
inuttassarsiuunneqartut
Ukiup
ataatsip ingerlanerani sulisut 35-t soraarsimanerat qanoq
isumaqarfigaajuk? Tamanna nalinginnaasutut isigaajuk?
- Naamik, tamanna nalinginnaanngilaq. Suliffiit assigiinngitsut,
tamarmik pingaarutillit, soraarfigineqarput. Immikkoortortaqarfiit
ilaat sulisunik amigaateqarneq pissutigalugu annertuumik
tatineqaqqapput. Pitsaasumik atugaqarnissaq anguniarlugu annertuumik
suliniuteqarpugut, kisianni assigiinngitsunik pissuteqartoqarpoq,
Annga Lynge oqarpoq, soraartullu tunngavilersuutaat ataasiakkaat
oqaaseqarfigerusunngilai.
KNR-imi tusagassiortut
36-usussaapput. Kalaallit tusagassiortut maanna 18-iupput qallunaallu
tusagassiortut arfineq-marluusut taakkunannga pingasut paarlattaasuupput.
Tassa KNR tamaat eqqarsaatigalugu atorfiit aqqanillit
inuttaqanngillat.
Annga Lynge siorna
septembarip aallaqqaataani pisortatut atorfinitsinneqarpoq. Taassuma
aqutsisut allat peqatigalugit suliffimmi avatangiisit
sulisussaaleqinerlu pissutigalugit ajornartorsiutit misissorneqarput.
- Suli misissuivugut.
KNR-ip iluatsinnerpaaffia tassaavoq atorfiit imarisaat. Inuit
suliatik nuannaraat, kisianni suliassat amerlavallaarput
immikkoortortallu akornanni assigiinngiiaarlutik. Tamanna
naammaginanngilaq, Annga Lynge oqarpoq
Pisortat amigaataasut
Anita
Cramer Corpas apriilip aallaqqaataani 2024-mi
nutaarsiassaqartitsivimmi pisortatut atorfinitsinneqarpoq. Atorfik
januaarip aallaqqaataani Alice Sørensenip atorfimminit
tunuarniarluni aalajangerneraniilli inuttaqarsimanngilaq. Kalaallisut
oqaasillit tusagassiortut, aaqqissuisut immikkoortortaqarfimmilu
pisortat atorfinitsinniarnerat unammillernartuusoq Annga Lynge
oqarpoq. Atorfinnut taakkununnga qinnuteqartut killeqarmata. Tamanna
pissutigalugu suliat ingerlarnga aaqqissuussinerlu
eqqarsaatigeqqittariaqarsimagitsik pisortaq oqarpoq.
-
Pisortaq soraarniuteqaraangat nuannerneq ajorpoq, soorlu radiomi
pisortaq maanna soraarniuteqartoq. Immikkoortortaqarfik
ingerlalluarpoq suliffimmilu ataqatigiilluartoqarluni.
Aaqqiinissarput soorunami neriuutigineqarpoq.
Nammineq
iliuuseqarnini naammagisimaarneraa aperineqarami Annga Lynge ima
akivoq:
-
Periusissiap nutaap suliarineqarnera naammagisimaarpara. Maanna
taanna inaarsarneqarpoq, suliniutigineqartussanik
siunnersuuterpassuaqarpoq, qanorlu iliortoqarsinnaanera
oqaloqatigiissutigineqarluni.
-
KNR-ip ajornartorsiutai ammasumik eqqartorusuppakka, KNR-ip pisortaa
oqarpoq.
Aningaasarsiat
pissutaallutik qinnuteqartut tunuartertarput
Aningaasarsiat
pillugit isumaqatiginninniarnerit qanittukkut aallartissapput,
tassanilu Annga Lyngep nunatsinni tusagassiortut akissarsiaat
sulinermullu atugassarititaat allanngortinneqarumaartut neriuutigaa.
Pingaartumik KNR-imi aningaasarsiat eqqarsaatigalugit, taakkumi
pissutigalugit qinnuteqartut tunuartertartut pisortaq oqarpoq.
-
Amerlanertigut qinnuteqartoqaraangat akissarsiat sulisulluunniit
inissaqannginnerat pissutigalugu qinnuteqartoq tunuartarpoq.
Sulisunik
amigaateqarneq pissutigalugu sulisut amerlanerusunik
suliassaqarnerminnik tatineqartartut Annga Lynge oqarpoq.
- Tatineqaqqanerup sulianik tanngassimaaruteqarneq tammartittarpaa. Maannalu inissisimaneq eqqarsaatigalugu tapersersoqatigiilluta suleqatigiinniarsarivugut.