Københavnimi ilitsoqqussaralugu oqaatsit atorlugit ilinniartitsineq immikkut suliniutigineqartussatut akuerineqartoq
Kalaallit savalimmiormiullu ilitsoqqussaralugu oqaatsitik atorlugit ilinniartinneqarsinnaanerat pillugu paasissutissiisarnissamut suliniuteqarnissamut siunnersuut Københavns Kommunep akuersissutigaa.
Siunnersuut sisamanngornermi unnukkut Københavnip illoqarfiata allaffiani partiinit tamanit akuerineqarpoq.
Assi: Liselotte Sabroe/Ritzau Scanpix
Kommunimi ilitsoqqussaralugu oqaatsit atorlugit ilinniartitsineq siuarsarniarlugu Enhedslistenip Venstrellu siunnersuutaat Københavnimi innuttaasunut sinniisut maajip 22-ani akuersissutigaat.
Angajoqqaat kalaallit savalimmiormiullu meeqqatik nunaminni oqaatsitik atorlugit ilinniartinneqarsinnaanersut pillugit immikkut qanoq paasissutissiisinnaanersut maanna Københavnimi meeqqat inuusuttullu pillugit ingerlatsiviup paasiniartussanngorpaa.
Kalaallit savalimmiormiullu Danmarkimi innuttaassuseqaramik ilaatigut pisortat ingerlatsineranni nunami allamiutut isigineqanngillat.
Siunnersuut tamanna ingammik kalaallit ilitsoqqussaralugu oqaatsitik atorlugit ilinniarnissamut periarfissaminnik atorluaannginnerat pissutigalugu saqqummiunneqarpoq.
Danmarkimi politikkilerinermi suleqatigiit imaannaanngitsut
2017-imiilli kalaallisut ilitsoqqussaralugu ilinniartinneqarnissamik qinnuteqartoq ataasiinnaasoq kommuni ukioq manna siusinnerusukkut ilisimatitsivoq. Pisinnaatitaaffitilli paasileriarunikkit amerlanerulissasut siunnersuuteqartut ilimagalugulu neriuutigaat.
Partiit politikkerillu allat akerlilersuinngimmata siunnersuut taasissutiginagu akuerineqarpoq.
Enhedslisten Venstrelu politikkikkut isumaqatigiinngissuteqarajupput, Københavns Kommunimili Naalagaaffeqatigiinnermik ukkataqarnermikkut isumaqatigiipput.
Assersuutigalugu partiit taakkua marluk nunat pingasut erfalasuinik Rådhushallenimi nivinngaasoqarnissaanik siunnersuuteqaqataapput. Ukiuttaaq aallartinnerani USA-mit politikerinik tikeraartoqarnissaq nalunaaruteqartarnerlu akerlilerniarlugit Kalaallit Nunaat tapersersorlugu akerliussutsimik takutitsisoqarmat aamma suleqatigiipput.
