Københavnimi kalaallit atugarliortut illuat piviusunngorpoq
Kalaallit atugarliortut Danmarkimi illoqarfiit pingaarnersaannut nuuttut ikiorneqarluarnerunissaannik illu siunertalik Københavnip kommuniani aningaasanik immikkoortitsivigineqarpoq.
- Kalaallit atugarliortut Danmarkimi aaqqissuussaanermi kulturimillu nalornissuteqarnermikkut atugarliornerulernissaat pinaveersaartissavarput. Tassanilu Assak iluaqutaassaaq, isumaginninnermut borgmesteri Karina Vestergård Madsen oqarpoq (EL).
Foto: Colourbox
Københavnimi Rådhusimi missingersuutit isumaqatiginninniutigineqarneranni kalaallit tikeqqammersut atugarliortut ikiorneqarnissaannut tapiiffigineqarnissaannullu siunnersuut aningaasaliiffigineqarpoq.
Illu Assammik atilik pilersinneqartussanngorpoq.
Illup sananissaanut isumaginninnermut borgmesterip Karina Vestergård Madsenip (EL) siunnersuutaa sapaatip-akunneri marluk matuma siorna akuerineqarpoq, maannalu aningaasartassai inissillutik. Taamaalilluni Assak piviusunngorpoq.
Københavns Kommune tusagassiuutinut nalunaarummi taama allappoq.
- Kalaallit atugarliortut Danmarkimi aaqqissuussaanermi kulturimillu nalornissuteqarnermikkut atugarliornerulernissaat pinaveersaartissavarput. Tassanilu Assak iluaqutaassaaq, Karina Vestergård Madsen oqarpoq.
Kalaallit Københavnimut nuuttut amerlanerpaartaat ingerlalluartartut aamma oqaatigaa.
Ukiulli tamaasa innuttaasut 75-it 100-llu akornanniittut ikiorneqarnissaminnik tapersersorneqarnissaminnillu pisariaqartitsisut tikittarput, taakkualu tikinneranniit ikiorneqarsinnaalersikkusunneqarput.
2027-mi atulissasoq
Kalaallit nooqqammersut Assammi peqqissutsimut, ineqarnermut, ilinniagaqarnermut, suliffimmut aanngajaarniutinillu atuinermut katsorsarneqarnissamut neqeroorfigineqarnissamik siunnersorneqarsinnaapput. Oqalutseqarsinnaaneq aamma aningaasaliiffigineqarpoq.
Piffissami 2026-miit 2029-mut katillugit 11,3 millionit koruunit Assammut immikkoortinneqarput, taakkununnga 250.000 koruunit illu 2027-mi ammarneqarsinnaaqqullugu piaarnerpaamik suliariumannittussarsiuussinissamut atugassanngortinneqarlutik. Assak sullitassanut ilisimasalinnit, qallunaallu kulturianni inuulernermi unammillernarsinnaasunik nalunngisalinnit pisortat avataannit aqunneqassaaq.
Aammattaaq kalaallit meerartaat, aamma kalaallit savalimmiormiullu meerartaannut angerlarsimaffiup avataanut inissinneqarsimasunut, ilitsoqqussaralugu oqaatsiminnik ilinniartinneqarnissaannut missingersuutinik isumaqatigiinniarnermi aningaasaliiffigineqarpoq.
