Københavnimi politikerit ilitsoqqussaralugu oqaatsit atorlugit ilinniartitsineq kalaallit meerartaannut qulakkeerniaraat
Københavnimi meeqqat kalaallit ilitsoqqussaralugu oqaatsitik atorlugit ilinniartinneqarneq ajorput. Politikkikkut siunnersuummi maanna suliarineqartumi Københavnimi angajoqqaat kalaallit savalimmiormiullu taamatut periarfissaqarnera pillugu tusartinneqarnissaat qulakkeerniarneqarpoq.
Gorm Anker Gunnarsen Enhedslistenimeersoq, Rådhusip inersuartaani Naalagaaffeqatigiinnerup erfalasuata saavani
Assi: Nammineq pigisaq
Danmarkimi meeqqat kalaallisut savalimmiormiusullu oqaasillit namminneq oqaatsitik atorlugit ilinniartinneqarsinnaatitaapput. Meeqqalli Københavnip Kommuniani najugallit kalaallisullu oqaasillit periarfissaq taanna atorneq ajoraat paasinarsivoq.
- Pisariaqartitsinnginnermik pissuteqarunanngilaq, kisiannili ilisimasaqannginnermik pissuteqarnerugunarpoq. Tamanna kommunitut pimoorutissavarput. Naalagaaffeqatigiinni naligiinnermik akuutitsinermillu kissaateqarutta kikkut tamarmik pisinnaatitaaffitik ilisimassagaat qanorlu atorsinnaaneraat qulakkeertariaqarparput, Enhedslistenimi kommunalpolitikeri Gorm Anker Gunnarsen oqarpoq.
Taamaammat partiia Venstre peqatigalugu ullumikkut sisamanngornermi maajip 22-ani Københavnimi innuttaasunik sinniisoqarfimmut saqqummiunneqartussamik siunnersuuteqarpoq.
Siunnersuutip kingunerisaanik angajoqqaat Savalimmiuni Kalaallit Nunaannilu inunngorsimasut tamarmik meeqqatik nunaminni oqaatsit atorlugit ilinniartinneqarsinnaanerannik paasissutissinneqartarniassammata kommunimi meeqqat inuusuttullu pillugit immikkoortortaqarfik aaqqiissutissarsiussaaq.
– Oqaatsit kisimik pineqanngillat. Kinaassutsimut, ataqatigiinnermut aamma nammineq oqaaserineqartut atornissaannik pisinnaatitaaneq pineqarput, Gorm Anker Gunnarsen oqarpoq.
Immikkut ittumik suliniuteqarneq
Københavnimi oqaatsit ilitsoqqussat pillugit ilinniarfimmi maanna savalimmiormiutut atuartoqarpoq. Akerlianilli 2017-imili kalaaleq ataasiinnaq ilitsoqqussaralugu oqaatsit atorlugit ilinniartinneqarnissaminut saaffiginnissimavoq. Tamanna ingerlatsiviup ukioq manna siusinnerusukkut ilisimatitsissutigaa.
Taamaammat „immikkut ittumik suliniuteqartoqarnissaanut“ piffissanngorpoq, Enhedslisten aamma Venstre isumaqarput.
– Kalaallit inersimasut amerlasuut meeraanerminni inuusuttuunerminnilu Københavnimiissimasut Danmarkimiluunniit allamiissimasut ilitsoqqussaralugu oqaatsiminnik annaasaqarsimanertik ullumikkut annaasaqaatigingaarpaat, partiit siunnersuutertik tunngavilersorlugu allapput.
Ilitsoqqussaralugu Oqaatsinik Ilinniarfik kalaallisut ilinniartussanik nutaanik pilersitsissasoq Meeqqanut inuusuttunullu ataatsimiititaliaq sisamanngornermi taasinissaq sioqqullugu aalajangerpoq.
