Kokain pillugu suliaq naammassisoq

Suliaq qaqutigoortoq Sermitsiamit qanittukkut sammeqqammerparput, tassalu kokainilerisimasunik eqqartuussineq. Angutit marluk S-imik N-imillu taagukkavut, kokainilerisimasutut ukiuni arfinilinni ukiunilu marlunni affarmilu pineqaatissinneqarsimasunut inissiisarfimmiittussanngorlugit, augustip aallaqqaataani eqqartuunneqarput.

Kokaini pillugu suliami eqqartuussaasut unnerluussutini arlalinni pisuutinneqartut

Taakku suliareqqitassanngortitsissanerlutik ulluni 14-ini eqqarsarfissaqareerlutik taamaaliussanatik aalajangersimasut unnerluussisussaatitaasoq illersuisullu marluk Sermitsiamut ilisimatitsipput. Taamaalilluni suliaq Nunatta Eqqartuussisuuneqarfianut ingerlateqqinneqanngimmat Eqqartuussisoqarfik Sermersuumi aalajangiineq atuuttussanngortinneqarpoq.

S kokainimik eqqussuinermut peqataasimasutut, kokainimik tigumminnittutut, cannabisimik naatitsisimasutut sioorasaarisimasutullu eqqartuunneqarpoq, kokainimilli eqqussuinermut allamut peqataasimasutut pinngitsuutinneqarluni.

N kokainimik tigumminnittutut sioorasaarisutut eqqartuunneqarpoq, tarnikkulli naalliutitsisimasutut pinngitsuutinneqarluni. Tarnikkut naalliutitsinermik suliaq Nunatsinni siullersaavoq.