Kommunalbestyrelsi nutaaq: Nunaqavissut salliutillugit isumaqatigiittut
Avannaata Kommuniani Siumut Nalerarlu ukiuni sisamani tulliuttuni suleqatigiinnissamut isumaqatigiissuteqarput. Nunaqavissut ukkatarineqarnissaat kommunalbestyrelsinngortut pingaartippaat, kommunerujussuullu ineriartortinnissaa anguniarneqarluni.
Lars Erik Gabrielsen (S) Avannaata Kommuniani borgmesterinngorpoq. Siumut Nalerarlu suleqatigiinnissamik isumaqatigiissuteqarput.
Assi: Siumuts valgplakat
Avannaata Kommuniani kommunalbestyrelsimi ulluni pingasungajanni isumaqatiginninniartoqareersoq partiit suleqatigiinnissamik isumaqatigiissuteqarput.
Siumut, Lars Erik Gabrielsen siuttoralugu, Naleqqamik suleqateqarnissamik isumaqatigiissuteqarpoq, tassani ukiuni sisamani anguniakkat arlallit suleqatigiissutigineqassallutik.
Marlunngormat qinersinermi Siumup ajugaanerata kingorna borgmesterinngortussanngortoq Lars Erik Gabrielsen taama paasissutissiivoq.
- Isumaqatigiissut tamaat eqqarsaatigalugu nunaqavissut sulisorineqarnissaat pingaartinneqarpoq. Kommunitsinnilu illoqarfiit nunaqarfiillu imminnut ungasinnerat eqqarsaatigalugit, soorlu qinersinerup inernerani takuneqarsinnaasoq, isorliunerusut ukkatarineqarnerunissartik kissaatigimmassut tamanna isumaqatigiissutitsinnut ilanngupparput, Lars Erik Gabrielsen atsioqatigiinnermi Facebookikkut toqqaannartumik aallakaatitami oqarpoq.
Isumaqatigiilluartut
Illuatungeriit - Siumut Nalerarlu - isumaqatigiinniarnermi isumaqatigiilluinnarsimasut Lars Erik Gabrielsenip erseqqissarpaa.
Avannaata Kommuniani kommunalbestyrelsi 17-inik ilaasortaqarpoq. Siumut qulinik ilaasortaatitaqarpoq Naleraq pingasunik ilaasortaatitaqarluni. Partiit taakku marluk qulinik amerlanerussuteqarput illuatungiliuttut Atassut marlunnik, Demokraatit sisamat IA-lu ataatsimik ilaasortaatitaqarlutik.
- Suleqatigiinnissarput qilanaaraarput, Lars Erik Gabrielsen oqarpoq.
Jens Napaattooq (N) Avannaata Kommuniani borgmesterip tulliatut siullertut ivertinneqartussanngorpoq.
