Kommunalbestyrelsimi ilaasortaq: – Orpissuup Nunaani tuttuliisinnaanissamut periarfissat misissorneqarlik
Aqqa Samuelsenip kissaatigaa, Namminersorlutik Oqartussat tapersersuineratigut Orpissuup Nunaani tuttuliisoqarnissaanut misissuisoqassasoq.
Fra Sermitsiaq.AG's arkiv
Kommune Qeqertalimmi Kommunalbestyrelsimi ilaasortaq Aqqa Samuelsen Orpissuup Nunaani tuttunik nuussuerusuppoq.
Taannami kommunalbestyrelsip septembarip 27-ani ataatsimiinnissaanut aalajangiiffigisassatut siunnersuuteqarpoq.
Orpissup Nunaani tuttuliisinnaanissamut periarfissat misissorneqarnissaannik suliamik aallartitsinissamut aaliangiiffigisassatut siunnersuut Ataatsimititaliaq Inoqarfimmut aammalu kommunalbestyrelsemut isummerfigisassanngorlugu nassiunneqarpoq.
- Orpissuup Nunaa tuttoqaraluarpoq, qaqutigoortumilli naammattoorsiffiusarluni. Orpissuup Nunaani tuttuliinikkut tuttut amerlisarneqarsinnaapput siunissarlu eqqarsaatigalugu inuussutissarsiornikkut tuttut iluaqutaalersinnaallutik. Orpissuup Nunaani tuttuliinikkut Kommune Qeqertalimmi inuussutissarsiornerup siuarsarneqarsinnaanera soqutiginaateqartut ilagivaat
Namminersorlutik Oqartussat aningaasaleeqataallik
Orpissuuo Nunaani tuttuliisoqarnissaanut misissuinissamut Namminersorlutik Oqartussat aningaasaleeqataanissaat Aqqa Samuelsenip kissaatigaa:
- Orpissuup Nunaani tuttuliisinnaanissamut periarfissat misissorneqarnissaannut tunngatillugu Namminersorlutik Oqartussat qanimut suleqatigineqarnissaat aningaasaleeqatiginissaallu pinngitsoorneqarsinnaanngilaq. Taamaammat Orpissuup Nunaani tuttuliinissamut periarfissat misissorneqarnissaannut Namminersorlutik Oqartussat aningaasaleeqataasinnaanerat ujartorneqartariaqarpoq, Aqqa Samuelsen naggasiivoq.
