Kommune pisortaanerugallartussamik ivertitsisoq 

Hans Jørgen Mørch Kommune Kujallermi ataasinngorpamiit pisortaanerugallartussatut ivertinneqassaaq.

Hans Jørgen Mørch avataaniit siunnersortaasimavoq, aningaasaqarneq immikkut sammillugu kommunimut ikiuussimalluni kiisalu pilersaarusiap suliarineqarnerani aallarteqqinneqarneranilu qitiusimalluni.

- Piffissami pingaarutilimmi tassani patajaatsumik ineriartorfiusumillu ingerlatsinissaq pisariaqarmat Hans Jørgen Mørch kommunimik kiisalu sulianik ingerlasunik ilisimaarinnilluarnini pillugu toqqarneqarpoq, Kommune Kujalleq tusagassiorfinnut nalunaaruteqarluni allappoq.

Pisortaanerup atorfeqarneranut isumaqatigiissutaa naammassisoq

Tine Pars kommunimi pisortaanerugaluarpoq, ukiunili isumaqatigiissuteqarfiusuni atorfeqarnera maanna naammassisimasoq, kommuni Sermitsiamut ilisimatitsivoq.

Kommune Kujalleq aningaasaqarnikkut ilungersunartumik inissisimavoq, Namminersorlutillu Oqartussanut aamma akiitsoqalersimalluni. Aningaasaqarnerup ilorraap tungaanut saatinnissaanut saatinnissaanut iliuusissat sipaarfissallu maanna aallartinneqarsimalerput.

Borgmester Malene Vahl Rasmussen (D) pisortaanerugallartutut ivertinneqartussaq pillugu oqarpoq kommuni allannguinissamik ilungersunartumik maanna suliaqartoq, pisortaanerungallartussarlu tamatumani pingaaruteqartumik inissisimassasoq. Tamatumani kommunalbestyrelsep pingaartutut isigisimavaat suliamut tunngatillugu ilisimaarinnilluartumik aqutsisussamik atorfinitsitsinissaq, suliffeqarfiup toqqisisimanissaa pillugu.

- Innuttaasut suli tapersersuinerat tatiginninnerallu qujassutigaarput, pisullu ingerlaqqinnerat pillugu ingerlaavartumik paasissutissiisassaagut, borgmester Malene Vahl Rasmussen oqarpoq.

Pisortanngortup siunnersortitut suliffeqarfiutini ingerlatiinnassavaa

Kommuni ilisimatitsivoq Hans Jørgen Mørchip pisortaanerugallartutut atorfinitsinneqarnera piffissami killilikkami atuutsinneqassasoq, taamaattumillu siunnersortitut suliffeqarfiutini saniatigut ingerlatissagaa.

- Piffissaq tamaat pisortaanerugallartussatut ivertinneqarpoq piffissami killilimmi. Hans Jørgen Mørch siunnersortitut siuliffeqarfiutiminik saniatigut ingerlatsissaaq suliassanillu ataasiakkaanik tigummiaqassalluni, kommunimilli ulluinnarni ingerlatsineq taavalu kommunimi pisortaanertut suliassat pingaarutillit pingaarnerutillugit suliarissavai, kommuni allappoq.