Kommuni 18,5 millionit koruuninik sinneqartooruteqarpoq
Qeqqata Kommuniani 2023-imut missingersuutit 6.3 millionit koruuninik amigartooruteqarnissamik missingersuuteqarfiugaluartut, ukiup naanerani sanaartornermut aningaasartuutit ilanngaatigereerlugit naatsorsuutit 18.5 millionit koruuninik sinneqartooruteqarfiupput.
Qeqqata Kommunia
Qeqqata Kommunia oqaluttuarisaanermini siullerpaamik 900 million koruunit sinnerlugit isertitaqarsimavoq, tamannalu sinneqartoornermik kinguneqarpoq.
Kommunip isertitai 2023-imi 922 million koruuniupput, missingersuutigineqartumit 865 million koruuninit 57 million koruuninik amerlanerullutik.
- Ukiup siulianut sanilliullugit isertitat 41.7mio. kr.-inik qaffariarsimapput. Tamannalu ilaatigut pissuteqarpoq sulisinnaasut amerlanerpaat qujanaqisumik sulinerannik. Tassami 2023-imi suliffissarsiortut agguaqatigiissillugu 2022-imut sanilliullugu qaammammut 70-inik ikinnerusimapput, Qeqqata Kommunia tusagassiuutitigut nalunaarummini allappoq.
Innuttaasut sulinerulersut
Isertitanit akileraarutinit ingerlatseqatigiiffiillu akileraarutiinit isertitat qaffassimanerat aningaasanik isertitaqarnerulernermut pissutaanerpaasoq, kommuni allappoq. Siornamut sanilliullugu isertitat 41,7 million koruuninik qaffariarput, tamannalu innuttaasut amerlanerusut sulisimanerannik pissuteqarpoq.
2023-imi suliffissarsiortut agguaqatigiissillugu 2022-imut sanilliullugu qaammammut 70-inik ikinnerusimapput.
Sanaartorneq ingerlalluartoq
Sanaartorneq ingerlalluarsimasoq, kommuni paasissutissiivoq.
Kommuni ataatsimut tamaat isigalugu sanaartornermut 80 millionit koruunit atorneqarsimapput, ukiup siuliani 60 millionit koruunit atorneqarsimasut:
- Naatsorsuutigisatsinniit isertitaqarnerusimanerput nuannaarutigigaluarlutigu ingerlatsinermut aningaasartuutigut aamma qaffakkiartornerat pissutigalugit sukannersumik ingerlatsinissaq mianersornissarlu suli pisariaqarput.
- Pissutigalugu immikkoortortaqarfiit ilaanni aningaasartuutit ukiup siulianut sanilliullugit appariarsimagaluartut, takusinnaavarput atugarissaarnermut immikkoortortaqarfimmi aningaasartuutit ukiup ataatsip ingerlaneriinnaani 31mio. kr.-inik qaffariaateqarsimasut.
Ingerlatsinermut aningaasartuutissatut missingersuutaaqqaartuniit 795 millionit koruuninit immikkut aningaasaliissutit ilanngullugit 823 millionit koruuninik ingerlatsinermut kommuni aningaasartuuteqarsimavoq, tassa missingersuutaaqqaartuniit 28 millionit koruuninik qaffasinnerusumik.
- Atugarissaarnermut immikkoortortaqarfimmi aningaasartuutit inunnik isumaginninnermut tunngassuteqartut annikillisaaffiginissaat ajornakusoortarpoq, pissutigalugu pissutsit assigiinngitsut siumut naatsorsorneqarsinnaanngitsut pinngitsooranilu aningaasaliiffigineqartariaqartut tassani pineqartarmata.
