Kommuni Avannaa Development aqqutigalu inissialialiortitsilersaartoq
Avannaata Kommunia inuusuttunut 30-nik misiliummik inissialialiortitsilersaarpoq - inissiat taakkua tuniniarneqassapput, tunineqanngippatali attartorneqarsinnaassallutik.
Foto: Shutterstock
Avannaata Kommuniani inissaaleqisoqarpoq, ajornartorsiullu taassuma aaqqiiviginissaa kommunip kommunalbestyrelsiata sulissutigaa. Avannaa Developmentilu, tassa Avannaata Kommuniata ineriartortitsinermut ingerlatseqatigiiffiutaa aqqutigalugu inissialiortitsinissamut aningaasaliilersaarpoq.
Avannaata Kommuniani kommunalbestyrelsi immikkut ittumik ataatsimeeqqammerput, tassanilu ilaatigut inissialiortitsinissamut pilersaarutit oqaluuseraat.
Kommunip attartorneqarsinnaasunik Avannaa Development aqqutigalu inissialiortitsinissi isumaliutigisareerpaa, taakkunanili ineqarnermut akiliutaasartussat qaffasippallaassaqimmata taamaatiinnarpaa. Taamaammat Avannaata Kommuniata Nuummi Tuapannguani inissialiornermi periusiusimasoq toqqammavigalugu maanna inissialiortitsilersaarpoq, taakkualu tassa tuniniarneqassapput tunineqanngitsortaallu attarneqarsinnaassallutik.
Inuusuttunut inissiat
Inuusuttunut 30-inik misiliummik inissialiortoqassasoq, kommunalbestyrelsip siunnersuutigaa. Tassa kommunalbestyrelse anginngitsunik marlunnillu sinittarfilinnik initalinnik tuniniarneqartussanik inissialiortitsilersaarput.
- Tunineqanngitstut attartortinneqassapput uanilu attartornermut akit qaffasisinnaanerat erseqqissaatigiumaneqarpoq, kisianni inissaaleqineq taama annertutigitillungu naatsorsuutingineqassaaq tamarmik tunineqarnissaat, kommunalbestyrelsip juulip aappaani ataatsimiinneranit imaqarnialiami allaqqavoq.
Inissiassat titartarneqareertut titartakkallu taakku atoqinneqarnissaat naatsorsuutigineqartoq, imaqarniliami aamma allaqqavoq. Titartaatitsinermilu naleqqussaanissaq 2 millionit koruunit missaannik akeqassangatinneqarpoq.
Avannaata Kommuniani Teknikkeqarfik suliniummi ataqatigiissaarisussaaq. Titartaatitsinermi aasaq manna naleqqussaasoqarlunilu pilersaarusiortoqassaaq, suliniummullu tamatuma kingorna tassa ukiaru suliariumannittussarsiuussisoqassalluni.
Neqerooruteqartoqareerpat, sanaartortitsinissamut Avannaata Development aqqutigalugu taarsigassarsisoqarsinnaanersoq kommunalbestyrelsip nalilissavaa, taamaaliortinnaguli Namminersorlutik Oqartussat inatsisitigut akuersissuteqartariaqarput.
Suleqatigiit Borgmesteriutitaqartut inassuteqaat akuerivaat. Illuatunngiliuttut suliap saqqummiunneqarnera naammaginannginnera tunngavilersuutigalugu, inassuteqaat akuerinngilaat.
