Kommunimut qinersineq puiorneqarunnanngitsoq ilisimatusartup qularinngilaa

Kalaallit Nunaanni qaammatini kingullerni tusagassiuutitigullu sammineqangaatsiarpoq.

Inatsisartunut qinersineq politikkikkut inissisimanerup agguataarneranik allannguilluinnartoq kisiat pinnagu USA-p præsidentiata Donald Trumpip oqaasii pissutigalugit nunarput nunanit tamalaanit maluginiarneqalerpoq.

Pisorpassuit tamakku nalaanni kommunimut aqagu apriilip aallaqqaataani qinersisoqartussaavoq. Danmarks Medie- og Journalisthøjskolemi lektori Roger Buch naapertorlugu qinersineq Inatsisartunut qinersinermit pingaaruteqarnerusoq.

- Nuna tamakkerlugu politikimiit pingaarneruvoq. Apeqqutimmi ulluinnatsinnut tunngasut, soorlu atuarfeqarfinnut, meeqqerivinnut aqqusinernullu tunngasut kommunip pingaarnertut akisussaaffigai. Taamaammat uanga isumanni kommunini politikki nuna tamakkerlugu politikkimiit pingaarneruvoq, oqarpoq.

Taamaattumik politikkikkut sammisat annertuut eqqarsaatigalugit qinersinerup uuma puiorneqarnissaa ernummatigineqarsinnaavoq. Roger Buchilli tamanna ernummatigisariaqannginnerarpaa.

- Puiorneqarnavianngilaq.

AAMMA ATUARUK

Ilisimatusartoq meeqqat atuarfiannik pitsannguinissamut pingasunik siunnersuivoq

"Misileraaneq" annertooq

Kalaallit Nunaanni kommunimut qinersinerit immikkut ilisimasaqarfiginngilai, Danmarkimili kommuninut politikki ukiuni 35-ni misissorsimavaa taamaattumillu assingussuteqartunik nassaarsinnaalluni.

Danmarkimi "misileraalluni“ 2001-imi qinersisoqarsimasoq oqaluttuaraa. Taamani ministeriunerup Poul Nyrup Rasmussenip Danmarkimi kommuninut aamma amtsrådinut qinersinerit saniatigut folketingimut qinersititsivoq. Tassa imaappoq ullormi ataatsimi qinersinerit pingasut ingerlanneqartut. Soorlu 2021-mi nunatsinni Inatsisartunut, kommuninut, nunaqarfinni aqutsisunut ilagiillu aqutsisuinut qinersisoqarneranisulli.

- Takusinnaavarput Danmarkimi qinersisartut taakku immikkoortissinnaalluaraat. Qinersinerup inerneri assigiinngilluinnarput, taamaattumillu aamma kalaallit qinersisartut inatsisartunut qinersinermut namminiilivinnermullu apeqqutit pingaarutillit Washingtonimilu Det Hvide Husimit oqariartuutaasut tamaasa immikkoortissinnaagaat qularinngilluinnarpara. Najugarisami pissutsit inernerillu ukkatarisinnaallugit, Roger Buch oqarpoq.

Qinersisut amerlassusaat taamaaginnarnissaa aamma ilimagaa. Taamaattumillu qinersisartut qularutigineqassanngitsut oqarpoq.

- Qinersinerit najugarisami naliliinermit pipput. Aamma qinersisartut isigineqartarnerminnit silatunerupput.

- Qinersisartut pimoorussilluinnarput. Taamaattumillu Kalaallit Nunaanni kommunimut qinersisoqartillugu USA-miit nipiliornerit eqqissiviilliornerillu tamaasa immikkoortissinnaavaat kommunimullu qinersineq piviusoq ingerlassinnaallugu, oqarpoq.

Tusagassiuutitigut sammineqartut

Trump Jr. Nuummut sivikitsumik tikeraarluni januaarip arfineq-aappaanni tikippoq, taamanimiilli USA-p Kalaallit Nunaannut soqutiginninnera annikinnerulersimanngilaq — akerlianilli.

Danmarkimi Kalaallit Nunaannilu tusagassiuutitigut sammineqangaatsiarpoq.

Tusagassiuutini kommunalbestyrelsimut qinersineq sammineqarpallaanngikkaluartoq qinersisartut qineqqusaartut allatigut malinnaaviginissaannik periarfissaqartut Roger Buch isumaqarpoq.

- Kommunimut qinersisartut amerlasuut politikerit nalunngisarisaraat aamma eqqaamasariaqarparput. Qineqqusaartut ukiorpassuarni ilisarisimaneqarsimapput, qinersisartullu ilarpassui illoqarfimmi qineqqusaartut najugaqarfigisaanni najugaqarput.

- Soorunami Kalaallit Nunaanni kommunit avinngarusimapput, taamaammat aamma qinersisartut ilaasa ungasissumi najugaqarnertik pissutigalugu politikerit ilisarisimanngilaat. Kisianni qinersisartut qinigassanngortitullu amerlasuut illoqarfinni annerni najugaqarput, tusagassiuutillu avaqqullugit imminnut ilisarisimalluarput, oqarpoq.

Roger Buchip kommunimut qinersineq nunatsinni tusagassiuutitigut naammattumik sammineqarnersoq nalilerusunngilaa, USA-li sammineqarpallaarsimappat akisussaasoq ataasiuvoq.

- Oqaatsitit tunngavigissagukkit, tassa kommunimut qinersineq sammineqarpallaarsimanngippat tassaapput tusagassiorfiit tamatumunnga aalajangiisuusimasut.

Apriilip aallaqqaataani kommuninut, nunaqarfinni aqutsisunut ilagiillu sinniisaannut qinersisoqassaaq.