Kommuninut qinersineq 1. april ingerlanneqassaaq
Kommunini kommunalbestyrelsenut ilaasortassanik qinersineq marlunngornermi 1. april 2025 ingerlanneqassasoq Qinersinermut ataatsimiititaliaq. Qinigassanngortitsinissamut killissarititaasoq februaarip 18-iussaaq, tassa qinersinissamut sapaatit akunneri arfinillit sioqqullugit, Qeqqata Kommunia nalunaarpoq.
Qinersisoqalerpoq. Kommuninut qinersinissaq aprilip aallaqqaataani 2025 pissasoq maanna nalunaarutigineqarpoq.
Assiliisoq: Leiff Josefsen
Qinersisoqartussanngorpoq. Maannalu qulakkeerneqarpoq kommuninut qaqugu qinersisoqassanersoq.
Qinersinermut ataatsimiititaliaq Namminersorlutik Oqartussaniittoq, kommunimut qinersineq apriilip aallaqqaataani nal. 9.00-miit 20.00-mut pissasoq kommuninut nalunaarutigaa.
Qeqqata Kommunia nittartakkamini nalunaarpoq qinigassanngortitsinissamut piffissaliussaq februaarip 18-anut killeqartoq, tassa qinersinissamut sapaatit akunneri arfinillit sioqqullugit.
Kommunalbestyrelsimut ilaasortanik Avannaata Kommuniani 17-inik, Kommune Qeqertalimmi 15-inik, Qeqqata Kommuniani 15-inik aamma Kommuneqarfik Sermersuumi 19-inik kiisalu Kommune Kujallermi 15-inik qinersisoqassaaq.
Kommunalbestyrelsimut qinersinerup saniatigut nunaqarfinni aqutsisunut aammalu ilagiit sinniisaannut qinersisoqassasoq nalunaarutigineqarpoq.
