Kommunip angusaq nuannaarutigaa – unammilligassaqarporli, borgmesteri oqarpoq
Qeqqata Kommunia siullermeerluni 1 milliaartit sinnerlugit isertitaqarpoq.
– Milliaartiluunniit angugaluarutsigu, qaffakkiartortunik aningaasartuuteqartuarnerput suli eqqaamassavarput, taamaammallu suli mianersussaagut, Malik Berthelsen angusaq pillugu oqarpoq.
Arkivfoto: Leiff Josefsen
Qeqqata Kommuniani politikerit kingullermik kommunalbestyrelsimi ataatsimiinnerminni 2025-mut ukiumoortumik naatsorsuutit suliaraat. Naatsorsuutillu kommunimi nuannaalersitsisumik pingaartumik angusaqarfiupput.
Kommunimiu siullermeerluni milliaartinik isertitaqarpoq. Eqqorluinnartumik 1.048.957.500 koruunit isertinneqartut naatsorsuutit takutippaat.
Borgmesterip angusat pingaartoq nuannaarutigaa, peqatigisaanillu mianersoqqusivoq:
– Milliaartiluunniit angugaluarutsigu, qaffakkiartortunik aningaasartuuteqartuarnerput suli eqqaamassavarput, taamaammallu suli mianersussaagut, Malik Berthelsen angusaq pillugu tusagassiuutinut nalunaarummi allappoq.
Kangerlussuarmi unammillernartoq tikkuaraa
Kommuni 2025-mi 47 milliuuninik sinneqartoorpoq. Sinneqartooraluarlunilu, isertitallu naatsorsuutigisamit annerugaluartut siunissami unammillernartoqarpoq:
- Angusap matuma akileraarutitigut isertitat qaffakkiartornerisa kingunerannik taamaallaat anguneqarnera oqaatigissavara, Malik Berthelsen erseqqissaavoq.
Kangerlussuarmi innuttaasut amerlasuusaat timmisartukkut angallannerup Nuup mittarfittaavanut nuunneqarnerata kinguneranik misinnartumik ikileriarsimanerat, ilanngullugu eqqaasitsissutigaa. Tamanna siunissami aningaasaqarnikkut ilungersunartussaasoq, borgmesteri isumaqarpoq.
Ingerlatsivik: Aningaasaqarneq aaqqissuussaanikkut unammilligassaqarpoq
Ingerlatsiviup aningaasaqarnerup ineriartorneranik nassuiaataani, ingerlatsinermut aningaasartuutit qaffakkiartuinnarsimanerat erseqqissarneqarpoq.
Ineriartornerup kommunip aningaasaqarneranut aaqqissuussaanikkut unammillernartutut kommunip isigaa, isertitammi siunissami amerliartuinnarsinnaannginnerat ilimagineqarpoq.
- Taamaammat ingerlatsivinni tamani sakkortusisamik aningaasaqarnikkut aqutsineq aallunneqarpoq, tamannalu nangittumik sammissavarput, taamaalilluni aningaasartuutit missingersuutit akuerineqartut iluanniiginnarsinnaaqqullugit, suliamik saqqummiussinermi ingerlatsivik allappoq.
Kommunip aningaasaqarnera ukiuni makkunani innuttaasut katitigaanerisa ineriartorneranik ilungersuatinneqassasoq ataatsimut isigalugu naatsorsuutigineqarpoq, tassani ukioqatigiiaarpaassuit soraarninngortussaapput, illuatungaanilu sulisinnaasut sulinermikkut ilapittuisut akileraarutitigullu isertitat annikilliartortussaapput.
