Avannaata Kommunia avinneqassaguni suut kingunerisinnaavai?
Kommuni avinneqassappat kingunerisinnaasai innuttaasunut paasititsiniutigineqartussaapput. Kisianni paasisassat innuttaasuniit suli utaqqineqartariaqassapput, Avannaata Kommuniani kommunalbestyrelsi pingasunngornermi juuni ulluisa 12-anni ataatsimiikkami paasissutissiissutigineqarpoq.
Avannaata Kommunia avinneqassaguni suut kingunerisinnaavai?
Kommuni avinneqassappat kingunerisinnaasai innuttaasunut paasititsiniutigineqartussaapput. Kisianni paasisassat innuttaasuniit suli utaqqineqartariaqassapput, Avannaata Kommuniani kommunalbestyrelsi pingasunngornermi juuni ulluisa 12-anni ataatsimiikkami paasissutissiissutigineqarpoq.
- Misissuineq kinguaattoornikuuvoq Namminersorlutik Oqartussanit kisitsisinik amingaateqarneq peqqutigalugu. Ulluni kingullerni kukkunersiuisut nalunaartuteqarput misissuineq julip qeqqani naammassineqarsinnaasoq.
Facebookikkut paasititsiniaaneq
Kukkunersiuisut nalunaarusiartik naammasseriarpassuk, innuttaasut nalunaarusiap imarisai pillugit ilisimatinneqassapput.
- Kommunip kukkunersiuisuisa nalunaarusiaq naammassippassuk paasissutissat kommunimi illoqarfinnut tamanut nassiunneqassapput. Illoqarfinni paasititsiniaanerit ingerlanneqarneranut atatillungu Nunaqarfinni Siulersuisut siulittaasui peqataasassapput, taakkualu sumiiffimminnut angerlartassapput paasititsiniaanerit ingerlateqqillungit.
Innuttaasut aamma naatsorsuutigisinnaassavaat paasititsiniaanerit kommunip Facebookiatigut toqqaannartumik aallakaatitsinikkut, suliaq ukiap ingerlanerani naammasseriitsiarpata.
Paasititsiniaanerit ingerlareerpata taasititsisoqarnissaa tullinnguussinnaasoq, kommunalbestyrelsi ilisimatitsivoq.
Kukkunersiuisut suliartik naammassippassuk paasititsiutigineqareerpallu taasititsineq pisinnaasoq, kommuni allappoq.
Periarfissat marlussuit politikkikkut sinaakkutaliunneqartut naapertorlugit nalunaarusiorput, sinaakkutaasullu sumiiffiit eqqarsaatigalugit ima isikkoqarput:
Sinaakkut siulleq: Ilulissat kisimi kommuniulluni, taavalu Uummannaq, Upernavik Qaanaarlu ataatsimut kommuniullutik.
Sinaakkutip aappaa: Ilulissat, Uummannaq, Upernavik Qaanaarlu tamarmik immikkut kommuniullutik.