Kommunip qatserinermut ilinniarfia nutaaq pisortatigoortumik ammarpoq

Ilitsersuisut sisamat ilinniartullu 15-it qatserisarfimmi salimi siullermi inimi piareersimallutik issiapput, borgmesteri Palle Jerimiassenip qatserinermut ilinniarfimmik pisortatigoortumik atoqqaarfissiortitsinerani.

- Tulluusimaarutigaara Avannaata Kommuniani qatserinermut tunngatillugu suliniuteqarnernut ilinniarfimmik neqerooruteqarsinnaaleratta. Alloriarneq annertoorujussuuvoq aamma nuannertorujussuuvoq ilinniarnissaminnut soqutiginnillutik ilinnialertut taamak amerlatigimmata, Avannaata Kommuniani borgmesteri Palle Jerimiassen oqarpoq.

Najukkami periarfissaq

Borgmesterip oqaluttuaraa najukkami ilinniagaqarnissamik periarfissaqarnissaq politikkikkut pingaartinneqartoq aamma qatserinermut ilinniarfik alloriarnerusoq nutaajusoq pingaarutilik.

Maannamut qatserisartunngorniarlutik soqutiginnittut Danmarkimut aallartariaqartarsimapput ilinniariarlutik. Tassanilu ilinniarneq qallunaatut ingerlanneqartarpoq aamma tamanna unititsiinnartartut amerlanerannut tunngaviit ilagaat. 

Maannakkut Ilulissani qatserinermut ilinniarfik kalaallisut ilinniarnissamik neqerooruteqalerpoq, ilinniarnerullu imarisai issittumi avatangiisinut immikkut tulluarsagaapput.

- Upalungaarsimanermik sulialinnut ulloq pingaaruteqartorujussuuvoq aamma neriuppugut amerlasuut ilinniakkaminnik naammassinnikkumaartut, taamaasilluta kommunip upalungaarsimasui nukittorsarniassagatsigu, upalungaarsimanermut pisortaq Isak Pjetturson oqarpoq, taanna Avannaata Kommunia ilinniarfissatut akuerineqarnissaanut annertuumik suliaqaqataasimavoq.

Ilinniartut sapaatip akunneri tullii sisamat suliatigut sungiusarnerit assigiinngitsut naammassissavaat soorlu assersuutigalugu ikuallattumik qamisaaneq aamma atuagarsornerit annertuut pulaffigissavaat "Funktionsuddannelse i indsats” –qatserisartunut tunngaviusumik ilinniagaq naammassiniarlugu.

Sungiusaasut sisamat aamma najukkami ilinniarsimasuupput Beredskabsstyrelsen peqatigalugu nalileeqataasartussamik toqqaasimallutik.