Kommunit ammaannartumik ikuallaanissamut piffissami sivisunerusumi periarfissaqalerput
Kommunit ammaannartumik ikuallaasarallarnissaat sivitsorneqarpoq. Immikkummi ittumik akuersissuteqarnerup sivisunerpaamik qaammatini pingasuni tunniunneqarsinnaaneranut piumasaqaammut 31. juuli 2025-p tungaanut immikkut akuersissuteqartoqarsinnaasoq, Naalakkersuisut aalajangerput. Kommunit taamaalillutik siornatigumut naleqqiullugu piffissami sivisunerusumi ammaannartumik ikuallaasarallarnissaminnut maanna periarfissaqalerput.
Nina-Vivi Møller Andersen / Sermitsiaq.AG
Naalakkersuinikkut Ataqatigiissaarisoqatigiit 12. aamma 13. septembarimi ataatsimiinneranni Naalakkersuisunit aamma kommuninit tamanit oqaatigineqarpoq 2025-p qiteqqunnerata tungaanut ammaannartumik ikuallaasarallarnissamut immikkut akuersissuteqartoqarnissaa kissaatigineqartoq.
Eqqagassalerinermik suliassaqarfimmi annertuunik unammilligassaqarnera, tamatumalu innuttaasunit akornutigineqarlunilu kipiluttunartinneqarnera Naalakkersuisut akuerigaat, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik tusagassiuutitigut allappoq.
Ilanngullugu allaaseraat eqqakkanik ikuallanneqarsinnaasunik avatangiisinut tunngatillugu tamatigut eqqortumik ikuallaasarnissaq Naalakkersuisut pingaartikkaat, taamaattumillu ESANI A/S nuna tamakkerlugu eqqakkanik sapinngisamik amerlanerpaanik aallertartoq Danmarkimilu eqqakkanik ikuallaavimmi ikuallagassanngorlugit assartortarlugit.
Ikuallaaviup aappaa utaqqineqarpoq
Nunali tamakkerlugu eqqakkanik ikuallaavissat marluusut 2025-p qiteqqunnerani naammassinissaasa tungaanut eqqakkat ajornartorsiutaanerat innuttaasunut malunnaateqaannartussaallunilu akornutaaginnartussaavoq, taamaattumillu Naalakkersuisut aalajangerput eqqakkat pillugit nalunaarummi allannguisoqarnissaanik akuersipput:
- Innuttaasut peqqissusaannut avatangiisittalu paarilluarneqarnissaannut tunngatillugu eqqakkanik ajornartorsiuteqarnerup naleqqunnerpaamik aaqqiissuteqarfiginissaa pillugu kommuninik anguniagaqarfiusumik oqaloqateqarneq Naalakkersuisut ingerlateqqikkusuppaat, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund allappoq nangillunilu:
- Ammaannartumik ikuallaasarnerit sapinngisamik pisinnaatillugu pinngitsoortinneqarnissaannik isumaqarnera attatiinnarpara. Aammali nassuerutigisariaqarlugu nuna tamakkerlugu eqqakkanik ikuallaaviit marluusut naammassinissaasa tungaanut eqqakkanut tunngatillugu ajornartorsiut annertujuassasut. Tamannalu isiginngitsuusaarsinnaanngilarput, taamaattumillu Naalakkersuisut aalajangerput 31. juuli 2025-p tungaanut eqqakkat pillugit nalunaarummi piumasaqaammut immikkut ittumik akuersissuteqartoqarsinnaasoq. Kommunit taamaalillutik – tigussaasumik qinnuteqaateqarnermikkut – 31. juuli 2025-p tungaanut ammaannartumik ikuallaasarallarnissamut immikkut ittumik akuersissummik tunineqarsinnaapput.
