Kommunitoqqanik ammaaqqinneq 350-680 millionit koruuninik aningaasartuutaanerussasoq

BDO-p nassuiaataa, Siusinnerusukkut kommunit aaqqissuussaanerannut uterpata allaffissornikkut ingerlatsinermut aningaasartuutinik erseqqissaasoq, januaarip naanerani politikkikkut ataqatigiissaarisut ataatsimiinneranni kingullermi nunami borgmesterinut saqqummiunneqarpoq.

Nassuiaammi kommunit aaqqissuussaanerat nutaaq 2023-mi aningaasat nalinginut naleqqiullugit 5,3 aamma 5,6 milliarder koruunit akornanni aningaasartuuteqarfiussasoq naatsorsuutigineqarpoq, aningaasartuutillu tassaapput suliassaqarfiit ingerlanneqarnerannut, allaffissornermut aamma politikkikkut aaqqissuussaanermut aningaasartuutit, sanaartornermullu aningaasaqarnermullu aningaasartuutit, taakkulu 2023-mi kommunini 480 millionit koruuniupput.

”Aningaasartuutit qaffasissusaat missiliunneqartoq 2023-mi aningaasartuutit piviusunngortitat aallaavigaat, kiisalu siusinnerusukkut kommunit aaqqissugaanerannut uteqqinnermi aningaasartuutinut ingerlaavartunut aningaasartuutaanerusut qaffasissusaannik missiliuussineq. Ukiumut aningaasartuutaanerusut ingerlaavartut 350 aamma 680 mio. kr.-it missaannut naatsorsorneqarput. Tamanna pisortanut immikkoortumi sulisoqarnerup qaffannera ukiumut suliarisinnaasat 630-t aamma 1.250-inut naatsorsorneqarnerannik kinguneqassaaq.”

BDO-p nassuiaataani allassimavoq.

Innuttaasut kinguneri ilisimassavaat

Inuppassuit kommunit avinneqarnissaat kissaatigimmassuk nassuiaat innuttaasunut saqqummiunneqartariaqassaaq, Qeqqata Kommuniani borgmesteri Malik Berthelsen (S) politikkikkut ataqatigiissaarisut naalakkersuisunit borgmesterinillu ilaasortallit ataatsimiinnerisa kingorna oqarpoq.

- Nalunaarusiap innuttaasunut saqqummiunnissaa pingaartuuvoq, naak naammagisimaarinninnermik misissuinerit takutikkaluaraat innuttaasorpassuit kommunit avikkusukkaat, qanorluunniit akeqaraluarpat, pissutsillu atugaat ajorseriarlutik. 

Taamaattumik Qeqqata Kommuniani kommunalbestyrelsemi aalajangerpugut kommunit avinneqarnissaat pillugu tikkuussisussamik innuttaasunik taasititsiniarluta. Tamannali pitinnagu nutaamik avitsinerup kingunerisassai pillugit innuttaasut qaammarsarneqassapput, Malik Berthelsen oqarpoq

Kommunini 17-iusuni 12-it missingersuutiminni amigartooruteqassasut

Kommunit isertitaat akileraartarnermiit ilaatigullu ataatsimut tapiissutiniit naligiissaarinermiillu isertitaasut BDO-p nassuiaataani erserpoq, isertitallu katinneri 2023-mi 5,8 milliard koruuniusut naatsorsorneqarsimavoq. Kommunit sulisoqarnerulernerannik aningaasarsiaqarnerulernerannillu pissuteqartumik 2023-mi akileraarutitigut isertitaqarnerusimapput, 2023-milu naligiissaarinermut aningaasat 2025-mi 119 million koruuninik iluarsiiffigineqarput.

Kommunitoqqalli ammaqqinneqarpata kommunini 17-iusuni aqqaneq-marlunni allaffissornermi politikkikkut aqutsinermilu aningaasartuutit qaffasinnerusut kommunit aningaasaqarnerannut 1 aamma 3 millionit koruunit akornanni amigartooruteqalersitsissapput, kommunillu missingersuutaanni amigartooruteqalersitsissapput, aningaasartuutit qaffasinnerusut annikinnerpaaffianni qaffasinnerpaaffiannilu inississagaluarpataluunniit, soorlu BDO-p nalunaarusiaani kommunit missingersuutaanni inummut ataatsimut amigartoorutit/sinneqartoorutit 1.000 koruunit naatsorsorneqarneranni takuneqarsinnaasoq.

”Pingaartumik kommuninut minnerusunut innuttaasumut ataatsimut annertunerpaamik amigartooruteqartussaapput. Taamaalilluni kommunit suliassaannut aningaasaliinernik allanik nassaartoqarnissaanik pisariaqartitsisoqassaaq aamma uteqqinnissaq pivusunngortinneqassappat, ullumikkumiit naligiissaarinermik ilusiliinermik kommuninut minnerusunut annertunerusumik isumalluutinik agguaasseqqinnermik eqqarsartoqartariaqassalluni.”, BDO-p nassuiaataani allassimavoq.

Sulisussarsiorneq ajornakusoortoq

Aningaasartuutit qaffannerat annertooq ilaatigut siusinnerusukkut kommunit aaqqissugaanerannut uteqqinnermi kommunit arfineq-pingasut 2000-t inorlugit innuttaasoqartussaanerat, suliassaqarfiit pingaaruteqarluinnartut soorlu politikkikkut allattoqarneq, aningaasaqarneq, sulisoqarnermut aqutsineq, IT-imik isumannaallisaaneq il.il. sulisoqarnikkut minnerpaaffianiittussamut pisariaqartitsineq pissutaavoq, kommuninummi annernut sanilliullugit kommunit taakkua innuttaasumut ataatsimut aningaasartuutaat annertunerunissaanik kinguneqartussaasoq BDO-p nassuiaataani ilanngullugu nassuiaatigineqarpoq.

Kommunini maannakkut tallimaasuni borgmesterit kommuninut mikinerusunut sulisussarsiornissaq qanoq ajornakusoortigisoq oqaluuseraat.

- Kommunit tallimaannaavugut, kommunillu ilaasa aamma avinngasussimasortaqartut isumaginninnermi, ilinniartitsinermi allanilu sulisussanik ilungersunartorsiorneq misigaat, aamma IT-p, inatsisilerinerup aningaasaqarnerullu iluani. 

- Taamaattumik takorlooruminaatsupilussuuvoq maannakkut kommunit suli amerlinissaat. Sulisussaqarniarnermik ajornartorsiutit qanoq aaqqissavavut? Kommunalbestyrelsinngorumaartussat kajumissaarusuppakka nalunaarusiami ilungersunartunik paasiniaanissaat, Kommune Kujallermi borgmesteri Stine Egede (IA) oqarpoq

Kommunitoqqamut uternissaq meeqqanut, utoqqarnut innuttaasunullu innarluutilinnut sunniuteqassammat mianersuutigisariaqartoq kissaatigaa, kommunillu siornatigut aaqqissuussaanerisa uterteqqinneqassagaluarpata kingunerusinnaasut pillugit pitsaanerusumik paasissutissiinissaq aamma piumasaraa.

Inuiaqatigiit ineriartornerat pissutigalugu utoqqaliartortilluni suliffeqartulluunniit allanngoriartortillugit pilersuinissamut nammatassat annertusiartuinnarnissaat ilimagineqartoq BDO-p nalunaarusiaani aamma allassimavoq.

Kommunimi aaqqissuussaanermik nutaamik ingerlatsinissamut pisariaqartumik sulisussanik pissarsisinnaanermut atatillugu, pingaartumik allaffissornikkut qitiusumik atuuffiit pingaaruteqarluinnartut eqqarsaatigalugit, soorlu IT, akissarsiat, sulisoqarnermut aqutsineq aamma aningaasaqarnermi/naatsorsuinermi atuuffiit pillugit kommunit aqutsisui annertuumik ernumassuteqartut allaaserisami allassimavoq.

Maannalu kommuniusut Inuiaqatigiit agguataarnerisa ineriartornerannut aamma takkussuullutik qimagussuullutillu nuuttarnermut kommunit mianernarnerulissapput. Kommunini inuiaqatigiit agguataarnerisa ineriartorneranni annertuumik assigiinngissuteqartoq ukiut qulit kingulliit inuit amerlassusaata ineriartorneranni takuneqarsinnaavoq.

Sunniuteqarnerulernissamut aqqut naannerusoq

Aammattaaq kommunitoqqamut uternerup iluaqutissartai navianartaalu pillugit siornatigut aaqqissuussaanermut uternerup illoqarfinni arlalinni kommunini suliffiit amerlanerulernissaat politikkerillu amerlanerulernissaat kingunerissagaa allassimavoq.

”Sulisut amerlineri sulisussaqarnerup qaffanneranut toqqaannartumik allanngortillugit naatsorsorneqarpata, sulisoqarneq 2,2 aamma 4,6 procentinik qaffassaaq, najukkamilu politikkikkut ukkataqarnerulernermut peqatigalugu sammisassat amerlinerannik kinguneqassasoq naatsorsuutigineqarpoq. Najukkami pisariaqartitat kissaatillu eqqarsaatigalugit iliuuseqarnissamut aqqut naannerulissasoq aamma naliliiffigineqarpoq, kommunit ataasiakkaat najukkami naleqartitat periusiallu aallaavigalugit annertunerusumik ineriartorsinnaalissallutik”. 

Assersuutigalugu Qaanaami innuttaasut Ilulissani borgmesterimut 1.000 kilometerisut ungasitsigisumiimmata Avannaata Kommuniani innuttaasut sunniuteqarnerulertariaqartut Jens Ole Nathanielsen (IA), politikkikkut ataqatigiissaarisut ataatsimiinneranni peqataasoq, oqarpoq.

- Innuttaasut sunniuteqaqataanerorusupput, tamannalu kommunerujussuarmi ersarissumik misigisarparput, Ilulissaniit Qaanaamut 1000 kilometerinik isorartutigimmat. Matumani najukkamik sunniuteqaqataanerup aalajangiisinnaassutsillu annertusinissaa pingaartuuvoq.  Sumiiffimmi qinigaaneq naleerussinnaavoq qinigaq aalajangerpat illoqarfimmut allamut nuunniarluni. 

-Taamaattumik aaqqiissutissanik naalakkersuinikkut oqallinnissaq pingaartuuvoq sumiiffimmi qinigaatitaqarnerup attatiinnarnissaanut. Kommuninut qinersinissami kommunit nutaamik aaqqissuuteqqinneranni innuttaasut sunniuteqaqataanissaat annertunermik sammineqartariaqarpoq, Jens Ole Nathanielsen oqarpoq.