Tasiilami ilinniartitsisunik kalaallinik
amigaateqartoqartillugu Ittoqqortoormiini allaanerusumik inissisimavoq.
Ittoqqortoormiit, illoqarfiit marluk kangianiittut 3.000 kilometerisut
isorartutigisumiittut aappaa, innuttaasunik nutaanik pingasunik qanittukkut
nuuttoqassaaq.
Tasiilami ilinniartitsisunik kalaallinik
amigaateqartoqartillugu Ittoqqortoormiini allaanerusumik inissisimavoq.
Ittoqqortoormiit, illoqarfiit marluk kangianiittut 3.000 kilometerisut
isorartutigisumiittut aappaa, innuttaasunik nutaanik pingasunik qanittukkut
nuuttoqassaaq.
Tassami ilinniartitsisutut ilinniakkaminnik
naammassinneqqammersut pingasut illoqarfimmi tassani atuarfittut kisiartaasumi
Ejnar Mikkelsenila Aluarpiani ilinniartitsisussatut sulilernissaminnut
akuersisimapput.
Taakkua ilagaat 26-nik ukiulik Nino B. Brønlund
Aasiaat kujataatungaani Kangaatsiameersuuvoq.
- Qilanaareqaara ulluinnarnilu pissutsit
nutaarluinnaat misigissallugit piareersimavunga, Nino B. Brønlund, ilinniaqatigisimasani marluk,
aammalu ilinniartitsisutut naammasseqatigisimasani peqatigalugit
nuuttussanngortoq oqarpoq.
Nino B. Brønlundip Nuummi Ilinniarfissuarmi
ilinniarnermini illoqarfik Tunumiittoq taanna sukumiinnerusumik
paasisaqarfigivaa.
- Ilinniaqatima ilaat Ittoqqortoormiini
ilinniarnerminnut atatillugu sungiusarsimapput, illoqarfimmiillu
tassanngaanneersut ilaat takkunnikuupput Ittoqqortoormiinilu ilinniarfik
pillugu oqaluttuullutik, soqutiginninneralu annertusiartuinnartinneqarpoq, Nino
B. Brønlund oqarpoq, taassumalu sivisuumik eqqarsaatigisimavaa
Ilinniartitsisutut ilinniarniarnini naammassiguniuk Ittoqqortoormiinut
Qaanaamulluunniit ilinniartitsisunngoriartorluni nuunniarluni.
Ilaquttani Kangaatsiamiittut sivisuumik
oqaloqatigereerlugit aalajangerpoq takorluukkani piviusunngortinniarlugu,
taamaalillunilu suliffeqarnerup tungaatigut aammali inuttut alloriarneq
annertooq pingaaruteqarluartoq alloriarfigisussanngorpaa.
- Nuunnikkut inuttut pisuunerulernissara,
qularinngilara ilinniarsimasannik inuttullu ineriartuutigissallugu
nuuffigigukku. Tassami aamma eqqarsaatima ilagigamikku ilinniartitsisutut
misilittakkannik ineriartuutigissallugu, nammineq illoqarfik aggerfigisara
ungasissorsuarmiikkaluartoq, Nino B. Brønlund oqaluttuarpoq.
Misilittagassat meeqqallu
Nino B. Brønlundip soqutiginninneranut suliffik kisimi
pineqanngilaq, aammali misilittagassarsiorneq pineqarpoq. Kultuuri,
ataatsimoorneq aammalu Ittoqqortoormiini pinngortitaq soqutiginartitaanut
ilaapput.
- Kulturi immikkuullarilluinnarlunilu
soqutiginartuusoq tusarpara, inuit pinngortitamut attaveqarnerat
inoroorsaarnerallu misigissallugit qilanaaraara, taanna oqarpoq.
Nino B. Brønlundip illoqarfik soqutigingaaraluarlugu
meeqqat taakkualu siunissaat pillugu suleqataassalluni aamma soqutigivai.
Taamaattumik ilinniartitsisut akissarsiaanik oqallinneq nunamilu illoqarfiit
avinngarusimanerpaat ilaanni sulinerup unamminiarnartuusinnaanera uniffiginagit
atorfik qinnutigissallugu nangaassuteqarsimanngilaq.
- Ilinniartitsisut akissarsiaat piareersaanermut
atuartunillu perorsaanermut tunngatillugu suliassarpassuarnut
akisussaaffeqarnermullu naleqquttuunersut eqqarsaatigineqartariaqarput, ingammik inuuniarneq taama akisutigitillugu. Uangali
meeqqanik sullisserusuppunga, taakkuninngalu ilusilersueqataanissaq
perorsaaqataanissaallu eqqarsaatigiinnarlugu assut nuannaraara. Uummatiga
taakku siunissaat pillugu sullissinissamut kajumissusseqarpoq, Nino B. Brønlund
oqarpoq. Taassumunngalu ilinniartitsisunngorniarnissamik siunnerfeqarneq
nalaatsornerinnaanngilaq.
- Nunatsinni ilinniartitsisut amigaataanerat
ilinniartitsisullu amerlasuut soraarninngorumaarnerat aamma ilisimalernikuuara,
tamannalu pissutigalugu ilinniartitsisunngorniarlunga aalajangerpunga.
Pissutsit pitsaanerulernissaat anguniarlugu
iliuuseqaqqusivoq
Nino B. Brønlundip ilinniartitsisut
amigaataangaarnerat innersuussutigalugu ilinniartitsisunut atugassarititaasut
pitsanngorsarneqarnissaat kaammattuuteqarpoq.
- Ilinniartitsisut amigaatigineruleriartortillugit
ilinniartitsisunngorniarnerup qanoq kajungernarnerulersinnissaa
eqqarsaatigeqqittariaqarpoq, taanna oqarpoq.
Nino B. Brønlundip aamma
ilinniartitsisunngorniarusullutik eqqarsaateqartut kajumissaarpai
alloriaqqullugit.
- Meeqqanik sullissineq nuannersuummat, nunamullu
iluaqutaasumik sulissuteqarniaraanni ilinniartitsisunngorniarnissamik
soqutiginnittut kajumissaarusuppakka ilinniarfissuarmi ilinnialeqqullugit.
Nino B. Brønlund Ittoqqortoormiiniissimanngisaannarpoq,
tamannali piumassusianik annikillisitsinngilaq. Paarlattuanilli pisoqarpoq.
- Tikissimanngisaannarpara. Illoqarfiup takunissaa
inuillu naapinnissaat qilanaareqaara. Pissanganartorujussuuvoq. Tusartakkakka
naapertorlugit pinngortitamut qanittumi inuuneqarput, tamannalu misigissallugu
qilanaareqaara, Nino B. Brønlund oqarpoq, taannalu suliffimmut akuersinerminut
atatillugu immikkut ittumik tupaallatsinneqarpoq. Nuannerunartitsinerlu
annertusarneqaannarluni.
Ittoqqortoormiini ilaqutaqarlunga paasitinneqarpunga,
taakkulu naapinnikuunngilakka, maannalu naapittussanngorpakka, tamanna aamma
pissanganermik immikkuullarissumik pilersitsivoq, Nino B. Brønlund
oqaluttuarpoq.
Taanna atorfineqataalu marluk pingasuullutik
Ittoqqortoormiinut nuukkiartorlutik qaammat una Tunumut angalaqatigiissapput.
