Kunngikkormiut angerlarput: - Uangattaaq Kalaallit Nunaannut asannilerpunga

Sapaatip-akunnera angalaneq Kujataani siallersumi naammassivoq

- Naamik, aamma uanga Kalaallit Nunaat kalaallillu asannilerfigisimallugit oqartariaqarpunga, dronning Mary kunngi Frederik Danmarkimut angerlaqatiginagu oqarpoq.

Ulluni arfineq-marlunni illoqarfiit nunaqarfiillu qulit.

Kalaallit Nunaanni angalaneq tamanna danskit kunngiata Frederiup dronning Maryllu naammassivaat. Arfininngormat ualikkut Qassiarsummi sivikitsumik siallingaatsiartumilu kaffisortitsisuneereerlutik pisuttuareerlutillu Danmarkimut angerlamut aallarput. Kunnginngortitsinerup kingorna kunngikkormiut siullermeerlutik Kalaallit Nunaannut angalanerminni kujataani nunaqarfik taanna kingullertut tikippaat.

Narsap Katersugaasiviani pisortaq Jesper Stormly Enevoldsen. Kunngikkormiut Narsamut tikeraarmata siallernera pissutigalugu akeqanngitsumik katersugaasivimmut inuit isertissinnaasimavai.

Igalikumi, Narsami Qassiarsummilu kunngikkormiut tikeraarneranni siallerujussuarpoq.

Narsami sialussuaraluartoq inuppassuit Kunngikkut ikaartarfiannukarput. Taakkua ilagaat Jesper Stormly Enevoldsen, Narsap Katersugaasiviani pisortaq.

- Qularnanngitsumik inuit pissangasimassapput, tamannalu pingaaruteqarpoq, illoqarfimmimmi ataasiussuseqalersitsisarmat. Kunngikkormiut pillugit assigiinngitsorpassuarnik isumaqartoqarsinnaavoq, isumaqarpungali maani nunami nalinginnaasumik inuttut iluarineqartartut, nunamummi tunngaqigamik, Jesper Stormly Enevoldsen oqarpoq.

Pilersaarutit allanngortut

UNESCO-p nunarsuarmioqatigiinnut kingornussassatut allattorsimaffiani Arnajaraq Bibi Bjerge takornariartitsisuuvoq.

Tallimanngormat kunngikkormiut Kujataanukaramik Igalikumukaqqaarput. UNESCO-p nunarsuarmioqatigiinnut kingornussassatut toqqarsimasaanut ilaasumik, Arnajaraq Bibi Bjergemit, Igalikumiit 3 kilometerisut ungasitsigisumi savaateqarfimmi najugalimmit, takornariartinneqarput.

Kunngikkormiut Qaqortumukartussaagaluarput, sikorsuilli pissutigalugit pilersaarutit allanngortinneqarput. Taamaattumik Arnajaraq Bibi Bjerge Igalikumi oqaluffiup eqqaani oqaluttuassartalimmi takornariartitsinissamik piareersaariasaartariaqarsimavoq.

- Tikeraarnissaat pilersaarutaanikuunngimmat soorunami pissangavunga. Tikeraarnerat nuanneqaaq; ukiut tamaasa ullullu tamaasa taama pisoqarneq ajorpoq, Arnajaraq Bibi Bjerge oqarpoq.

Asannilertoq

Kunngikkormiut angalanerat Pituffimmi aallartippoq, tamatumalu kingorna Qaanaamut, Aasiannut, Qeqertarsuarmut, Attumut, Sisimiunut, Nuummut, Igalikumut, Narsamut Qassiarsummullu angalapput.

Sorpassuarnut soorlu meeqqerivinnut suliffeqarfinnullu pulaarsimapput, innuttaasullu tusindillit ilassillugillu, pakkullugillu aalateriffigisimavaat. Kunngi killitsisimaqisoq Nuummi Katuami pisortatigoortumik nerersuartitsinermi oqalugiarnermini Kalaallit Nunaannut angalasarnini kunngitut inissisimaffimminut piareersaatigisimallugu oqarpoq.

- Kalaallit Nunaat kalaallillu asannilerfigigakkit piareersaatit aallartipput, oqarpoq.

Kujataani dronningi Kalaallit Nunaannut qanoq misigissuseqarfiginninnersoq aperineqarsinnaavoq.

- Suut tamarmik nuannersimaqaat, kunngikkormiunngornitsinni pilluaqqussutit killitsissutigingaartarpavut, meeqqavullu angalaqatigigatsigit nuannaarutigeqaarput.

Uiusoq kisimi Kalaallit Nunaannut asannileqqanerpa?

- Naamik, aamma uanga Kalaallit Nunaat kalaallillu asannilerfigisimallugit oqartariaqarpunga, dronning Mary oqarpoq.

Ingerlaqqinnissaminut piareersimasimasoq

Kunngi Frederik kunngiunngikkaluaruni Kalaallit Nunaanni piniartuusimassagaluarpoq. Kunngi taama oqarsimaneragaasarpoq. 2000-imi qaammatini tallimani Avannaaniissimareerluni kunngi nammineq taama oqarsimaneragaasarpoq.

Kunngikkut arfininngormat ualikkut Danmarkimut aallarput.

- Kiffaanngissuseqarluinnartutut misigisimavunga. Misigisaq nuannerluinnarpoq. Erseqqippoq piniartut inuussutissarsiutigisaat aqqusaarlugit angalaneq misigisaqartitsisoq, piniartullu kalaallit sumiiffinni ilisimalluakkaminni siuaasaminniillu kingornussaminni inuusarput.

- Piniarnermik aalisarnermillu inuussutissarsiuteqanngikkaluarlunga kisimiillunga ingerlaqqinnissannut piareersimasimavunga, qimussertartutummi pikkorissorsuartut nammineersinnaasutullu misigisimavissimavunga.

Taamaalilluni kunngikkormiut pisortatigoortumik Kalaallit Nunaannut tikeraarnerat arfininngornermi juunip 29-ani aallartittoq naammassineqarpoq.

Powered by Labrador CMS