Kunngip Frederiup sakkutooqarfimmut tikeraarnissaa taamaatippoq
Illersornissamut ministerip Troels Lund Poulsenip kunngillu Frederiup sakkutuunut alapernaarsuiartortitanut Siriusimut tikeraarnissartik sila pissutigalugu taamaatiinnartariaqarpaat.
Kunngip Frederiup Naalakkersuisut siulittaasuat Jens-Frederik Nielsen Amalienborgimi ataasinngornermi oqaloqatigaa.
Assi: Keld Navntoft/Ritzau Scanpix)
Kunngip Frederiup Kalaallit Nunaannut tikeraarnerani pilersaarutit allanngorteqqinneqartariaqarput.
Kunngi illersornissamullu ministeri Troels Lund Poulsen (V) Station Nordimut, sakkutuut alapernaarsuiartortitat Siriusip sumiiffianut, pingasunngornermi tikeraartussaagaluarput.
Silali pissutaalluni taamaatiinnarneqarpoq.
Illersornissamut ministeriaqarfik Ritzauimut taama ilisimatitsivoq, tamannalu kunngikkormiut ullorsiutaannik suliaqartunik uppernarsarneqarpoq.
Kunngip sisamanngornermi tallimanngornermilu Kalaallit Nunaanniinnerani pilersaarutit, Siriusimik alapernaarsuiartortitanik angalaqateqarnissaralua aamma taamaatiinnarneqartoq allassimavoq.
Station Nord Kalaallit Nunaanni mittarfiit avannarpasinnersaraat.
Siriusip ukiut 75-inngortorsiornerata malunnartinneqarnerani peqataaniaraluartoq
Station Nordimut tikeraarnissaq Siriuspatruljenip pilersinneqarneranit ukiut 75-it qaangiunnerannik nalliuttorsiornermut atatillugu pisussaagaluarpoq. Kunngi Frederik Siriusip alapernaarsuisuinut ilaaalluni kunngissatut qaammatini sisamani 2000-imi ilisimasassarsiornikuuvoq.
Nunanut allanut naalakkersuisoq Vivian Motzfeldt nunanilu avannarlerni ministerit pingasunngornermi Station Nordimut tikeraartussaagaluarput.
Station Nordimut pingasunngornermi tikeraarnissap taamaatinneqarnera Troels Lund Poulsenip Kalaallit Nunaannut angalanissaanik tamakkiisumik taamaatitsiinnartariaqarnermik kinguneqarpoq. Illersornissamik ministereqarfik inut nittartakkatigut naapittarfianni X-imi quppernermini allappoq.
Troels Lund Poulsen marlunngormat Kalaallit Nunaannukartussaagaluarpoq Vivian Motzfeldtilu ataatsimeeqatiginiaraluarlugu. Tikeraarnissaq piffissami kingusinnerusumi pissasoq ministeriaqarfik allappoq.
Kunngi 10.30 missaaq
Kunngi Frederik ulluni arlalinni tikeraarnissani aallarnerlugu ataasinngornermi unnukkut Kalaallit Nunaata illoqarfiisa pingaarnersaannut Nuummut tikittussaangaluarpoq.
Nuummili silarlunnera pissutigalugu tikinnissaa kinguarpoq, pilersaarutillu malillugit Danmarkimi nalunaaqutaq malillugu marlunngornermi nalunaaqutaq 13.30 tikissalluni.
Kunngip Kalaallit Nunaata naalakkersuisuisa siulittaasuat Jens-Frederik Nielsen, Københavnimut tikeraartoq, angalaqatigissavaa.
Kunngi Frederik nalunaaqutaq 11.30 kangerlummut angalaaqataassaaq, ualikkullu kaffisortitsinermi peqataariarluni nunami pisuttuassalluni. Marlunngornermi pilersaarutit naggaserlugit Hans Egedep illuani nereqatigiittoqassaaq.
Pingasunngornermi kunngip Ilisimatusarfik suli tikeraassavaa, tikeraarnermili pilersaarutit sinneri suli ilisimaneqanngillat.
Kunngi Frederik kingullermik siorna juunip naanerani Kalaallit Nunaanniippoq. Dronning Mary taamani peqataavoq.
Kalaallit Nunaat pillugu qaammatini arlalinngortuni eqqissiviilliortoqareersoq, ilaatigut amerikami præsidentip Donald Trumpip Kalaallit Nunaat aqussinnaalerusullugu oqariartuuteqaqattaareersorlu kunngi tikeraarpoq.
