KL

DK

ATORTUSSIASSAT AATSITASSALLU

Kuultisiorfik 2025-mi ammarneqassasoq naatsorsuutigineqarpoq

Ukiut arfineq marluk missaani piareersarnerup kingorna, suliniut maanna siuariartupiloorpoq, maannalu Naalakkersuisut nalunaarutigisinnaalerpaat naatsorsuutigalugu 2025-mi ammarneqarumaartoq. Tamanna ilaatigut isumaqarpoq 170-it tikillugit suliffiit nutaat Kujataani piviusunngussasut.

Amaroq Minerals Naalakkersuisullu naammagisimaarinnipput kuultisiorfiup ammaqqinnissaa siunertaralugu sulinerup siuariarnera pillugu. Naalakkersuisut ullumi nalunaarutigaat 2025-ip ingerlanerani ammaqqissasoq naatsorsuutigineqartoq.
Jensine Berthelsen
tusagassiortoq
Saqqummersinneqarpoq

Nunatsinni kommunit kujallersaannut aningaasaqarnikkut annikinngitsumik unammilligaqartumut nuannersumik nutaarsiassaqarpoq, aammalumi nunatsinnut tamarmut nutaarsiassaq nuannersuusoq qularnanngilaq.

Naalakkersuisut ullumi pingasunngornermi nalunaarput naatsorsuutiginnillutik kuultisiorfik Nanortaliup avannaatungaaniittoq 2025-ip ingerlanerani ammaqqinneqassasoq.

Akuersissutit pilersaarutit malillugit ingerlasut

Taamatuttaaq Naalakkersuisut nalunaarput suliffeqarfik novembarip naalernerani 2024-imi suliassanut aalajangersimasunut akuersissutinik arlalinnik ingerlatseqatigiiffik pissarsisimasoq.

Akuersissuteqarallarnermut siunertaavoq, ingerlatseqatigiiffiup teknikkikkut suliat ilaannik ingerlatsinerup aallartikkiartuaarnissaannut periarfissinneqarnissaa. Taamaalilluni ingerlatseqatigiiffik aatsitassarsiorfiup ammaqqikkiartuaarnissaamut aammalu Kalaallit Nunaata kujataani kuultinik tunisassioqqilernissamut periarfissinneqarpoq, Naalakkersuisunit ilisimatitsissutigineqarpoq.

Oqartussaasut suliffeqarfik suleqatigalugu suliniut pillugu ingerlaavartumik oqaloqatigiittut tassungalu ilanngullugu akuersissutit tullinnguuttut pillugit, aatsitassanut immikkoortortaqarfik nalunaarpoq.

Siuliani akuersissummik piginnittuusut nunarsuarmi kuultip akiata apparnera anigunngitsoornikuuaat

Nalunaq tassaavoq sumiiffik Kujataani Napasorsuup Qooruaniittoq, taannalu tassaavoq Kalaallit Nunaanni kuultisiorfiit siullersaat.

Kuultisiorfik 2004-imi ammarneqarpoq, aamma taamani annertuumik neriuuteqartoqarpoq isumalluarnartumillu naatsorsuutigisaqartoqarluni. Kisianni 2013-imi matuvoq sivisuumik aningaasaqarnikkut ajornartorsiuteqareerluni. Kuultip akiata nunarsuarmi appariarnerata kingunerisaanik.

Kisianni 2017-imi Islandimiut pigisaat Amaroq Minerals ammaanissaanut piareersalerpoq maannakkullu naatsorsuutigineqarpoq ungasigunnaartoq aatsitassarsiorfiup taassuma kuultimik qallueqqilernissaa.

Tassa tamatuma malitsigisaanik naatsorsuutigineqarpoq kuultisiorfimmi  2025-ip ingerlanerani ukiup sisamararterutaata aappaani ammaqqinneqassasoq, taamaalillunilu suliffissat 170-it tungaannut pilersinneqarnissaat ammaanneqassalluni, suliffeqarfiup saqqummiussinerani oqaatigineqarpoq.

Kilde: Amaroq Minerals

sydgrønland amaroq minerals inuiaqatigiit erhverv kirkespirdalen naalakkersuisut

ATORFIIT Se alle jobs

Powered by Labrador CMS