ILISIMATUSARNEQ

Legatimik pissarsisup FBI-imi ilinniartunngornissi takorlooraa

Ph.d.-nngorniaq Hans Peder Kirkegaard takornarialerisooqqaassamaaraluarpoq. Kalaallimulli ilinniartumut periarfissarpassuaqartoq Danmarkimi ilinniarnermi nalaani paasivaa

Hans Peder Kirkegaardip Pituffik Space Base pulaaraa

Ph.d.-nngorniaq Hans Peder Kirkegaard Fulbright Arctic Initiative Scholarshipimik pissarsigami ilinniaqqinnissaminut pissanganartumillu ilisimatusarnissaminut periarfissaqalerpoq.

Fulbright pillugu paasissutissaq:

Fulbright aallaavigalugu ilisimatusarneq nunarsuarmi tamarmi atuuppoq USA-milu ilisimatusariaatsit ataqqinarnersaasa ilaattut nalilerneqartarpoq. Fulbright Arctic Initiativep siunertaraa suliassaqarfiit akimorlugit suleqatigiinnikkut politikkimut tunngasunik paasissutissiisumik ilisimatusarneq issittullu siunissami isumannaatsuunissaanik, naapertuilluarfiunissaanik piujuaannartitsiffiunissaanillu anguniagaqarfiusoq.

 

– Fulbrightimi ilinniartuugaanni periarfissat ammartarput, USA-milu paarlaateqatigiinnikkut ilinniartuunissaq ilaatigut piumaqaataavoq. Washingtonimi Johns Hopkings Universitymi ”Intelligence Analysis”-imi masterinngorniarfiusinnaasumi ilinniartunngorsinnaanissara misissorpara. Washingtonimi Georgetown Universitymi ilinniartunngornissaq aamma soqutiginarpoq, FBI-illi immikkoortortaqarfiani ”Counterintelligence”-imiilernissara takorluukkama annersaraat, ilimanarpallaarunanngilarli, Hans Peder Kirkegaard oqarpoq, taanna ph.d.-nngorniarluni Nasiffimmi, tassa Nunanut Allanut Sillimaniarnermullu Ilisimatusarfimmi ilinniartuuvoq, taassumalu politikerit isertortumillu paasiniaasartut suleqatigiittarnerat aamma Issittumi nunap inoqqaavisa akornanni sunniutaalersinnaasut ilimanaataannik 2023-mili ilisimatusarpoq.

Takornarialerinermiit sillimaniarnermut politikkimut

Hans Peder Kirkegaard ilinniarnermini assigiinngitsorpaalunnik aqqusaagaqarpoq.

– Danmarkimi Roskilde Universitetimi bachelorinngorniarlunga aallartippunga. Ilinniarnerma ingerlanerani USA-liarpunga University of South Carolinami ”International Business”-imi masterinngorniariarlunga. Taassuma kingorna Kalaallit Nunaannut uterama naalagaaffinngornissamut naalakkersuisoqarfimmi sulilerpunga kingornalu nunanut allanut naalakkersuisoqarfimmi illersornissamut sillimaniarnermullu politikkimut tunngasunik suliaqarpunga taassumalu saniatigut Aalborg Universitetimi aaqqissuussinermi periussissiornermilu cand. merc.-itut ilinniaatigalunga.

Hans Peder Kirkegaardip FBI-imi immikkoortortaqarfianiilersinnaanissaa immaqa ilimanaateqalaarsinnaavoq. Taassumami pissaanillit takornartat nunap inoqqaavi pillugit sunniiniarlutik tapersersortissarsiortarnerat ilisimatusarfigaa, unnialu tamanna pillugu FBI USA-mi nunap inoqqaavinik suleqateqalereersoq. – Amerikamiut Københavnimi Aallartitaqarfiat oqaloqatigaara, paasinarsiumaarporlu. Attaveqarfiimmi atassuteqarfiillu apeqqutaasorujussuupput. 

Hans Peder Kirkegaardip takorarialerinermut tunngasunik suliaqarnissi pilersaarutigeqqaaraluarpaa, serviceøkonomitullu Campus Kujallermi ilinniagaqarluni.

– Københavnimili ilinnialerama pissanganartorpassuarnik periarfissaqalerpunga, pingaartumik nunani tamalaani ilinniaqqiffigisinnaasaqalerpunga, Kalaallit Nunaannilu nunanut allanut sillimaniarnermullu tunngasorpassuit misissorneqarsimanngitsut kingornatigut paasivara.

Sulilernissamut periarfissat 

Hans Peder Kirkegaard ilisimatusartutut sulilernissaminut periarfissaqarluarnerarpoq. Taanna Nasiffimmiiginnarluni ilisimatusarsinnaavoq imaluunniit Danmarkimi illersornissamik ilisimatusarfiup ilisimatusartoqatigiiviniilersinnaalluni. Kiisalu nunatsinni nunanut allanut tunngasunut sullissiveqarfimmiileqqinnissaminut aamma periarfissaqarpoq.

 – Sillimaniarnermut politikki maanna ilungersunartorsiorfiusorujussuuvoq – aamma Kalaallit Nunaanni – taamaattumik piginnaanngorsartuartariaqarpugut, Hans Peder Kirkegaard oqarpoq.

Ilinniartitaanermut tapiliussaq tamaat uani atuaruk.

Powered by Labrador CMS